قازاقستاننىڭ دامۋ بانكى 2 ملرد يۋانگە دەيىنگى نەسيە جەلىسى تۋرالى الدىن الا كەلىسىم جاسادى. بۇل شامامەن 300 ملن دوللارعا تەڭ. قاراجات قازاقستان ەكونوميكاسىنىڭ باسىم سالالارىنداعى جوبالاردى، سونىڭ ىشىندە قىتايمەن بىرلەسكەن باستامالاردى قارجىلاندىرۋعا جۇمسالماق، دەپ حابارلايدى infohub.kz سايتى.
China Construction Bank Corporation Astana Branch-پەن 2 ملرد يۋانگە دەيىنگى نەسيە جەلىسىن اشۋدىڭ الدىن الا شارتتارى تۋرالى كەلىسىم ينۆەستيسيالىق فورۋم بارىسىندا جاسالدى. قدب-دا ايتقانداي، قارجىلاندىرۋدىڭ تۇپكىلىكتى پارامەترلەرى — سوماسى، پايىزدىق مولشەرلەمەسى مەن مەرزىمدەرى — ازىرگە بەلگىسىز، ولار بويىنشا كەلىسسوزدەر ءجۇرىپ جاتىر.
تارتىلعان قاراجاتتى قازاقستان ەكونوميكاسىنىڭ باسىم سالالارىنداعى — ەنەرگەتيكا، ونەركاسىپ جانە كولىكتەگى — كاپيتالدى كوپ قاجەت ەتەتىن جوبالارعا، سونىڭ ىشىندە قازاقستان-قىتاي بىرلەسكەن جوبالارىنا باعىتتاۋ جوسپارلانۋدا. قاراجات ناقتى جوبالار ماقۇلدانعان سايىن بولىنەتىن بولادى.
سونىمەن قاتار قدب-دا قىتايدىڭ قاتىسۋىمەن بىرنەشە ءىرى جوبانىڭ ءقازىردىڭ وزىندە جۇزەگە اسىپ جاتقانىن اتاپ ءوتتى. اتاپ ايتقاندا، بانك VIGOR Holding كومپانياسىنىڭ قۋاتى 70 مۆت كۇن ەلەكتر ستانسيالارى پاركىنىڭ قۇرىلىسىن قارجىلاندىردى. بۇل كومپانيانىڭ ەڭ ءىرى اكسيونەرى — قازاقستاندىق ميللياردەر ۆلاديمير كيمنىڭ قۇرىلىمدارىمەن بايلانىستى توپ-مەنەدجەر دينارا ۋلدانوۆا.
سونداي-اق Sauran Solar Power كومپانياسىنىڭ قۋاتى 300 مۆت كۇن ەلەكتر ستانسياسىن جانە Karaganda Wind Power كومپانياسىنىڭ قۋاتى 500 مۆت جەل ەلەكتر ستانسياسىن سالۋعا وتىنىمدەر قاراستىرىلىپ جاتىر. بانك پورتفەلىندە جۇڭگو كومپانيالارىنىڭ قاتىسۋىمەن جۇزەگە اسىرىلاتىن تاعى ءبىرقاتار جوبا ءارتۇرلى كەزەڭدە قارالۋدا.
China Construction Bank Corporation Astana Branch — قىتايدىڭ ەڭ ءىرى بانكتەرىنىڭ ءبىرى China Construction Bankء-تىڭ «استانا» حالىقارالىق قارجى ورتالىعىندا تىركەلگەن فيليالى.
بۇعان دەيىن «بايتەرەك» پەن «سامۇرىق-قازىنا» قازاقستان ەكونوميكاسىنا 27 ملرد دوللار باعىتتايتىنى حابارلانعان بولاتىن.