قازاقستان ۇكىمەتى بىرنەشە مينيسترلىكتى قامتيتىن مەملەكەتتىك زاڭدى تۇلعالاردى اۋقىمدى قايتا ۇيىمداستىرۋدى بەكىتتى. № 604 «مەملەكەتتىك باسقارۋدىڭ كەيبىر ماسەلەلەرى تۋرالى» قاۋلى ۆەدومستۆولار قۇرىلىمىندا ءبىرقاتار بىرىكتىرۋ، قايتا قۇرۋ جانە تاراتۋدى كوزدەيدى، دەپ حابارلايدى infohub.kz سايتى.
مادەنيەت جانە اقپارات مينيسترلىگىندە «ۇلتتىق كينونى قولداۋ مەملەكەتتىك ورتالىعى» كوممەرسيالىق ەمەس اق شاكەن ايمانوۆ اتىنداعى «قازاقفيلم» اق-نا قوسىلادى. «كامەراتا قازاقستان» كلاسسيكالىق مۋزىكا ءانسامبلى جامبىل اتىنداعى قازاق مەملەكەتتىك اكادەميالىق فيلارمونياسىنىڭ قۇرامىنا ەنەدى. «بىرەگەي ىشەكتى اسپاپتاردىڭ مەملەكەتتىك كوللەكسياسى» ق ر ورتالىق مەملەكەتتىك مۋزەيىنە بەرىلەدى، ال كوزى ناشار كورەتىن جانە زاعيپ ازاماتتارعا ارنالعان رەسپۋبليكالىق كىتاپحانا ق ر ۇلتتىق كىتاپحاناسىنا قوسىلادى.
وقۋ-اعارتۋ مينيسترلىگىنىڭ ۆەدومستۆوسىندا ى. التىنسارين اتىنداعى ۇلتتىق ءبىلىم اكادەمياسىنا بىردەن ءۇش قۇرىلىم قوسىلادى: بالالاردى ەرتە دامىتۋ ينستيتۋتى، ارنايى جانە ينكليۋزيۆتى ءبىلىم بەرۋدى دامىتۋ ۇلتتىق عىلىمي-پراكتيكالىق ورتالىعى جانە قوسىمشا ءبىلىم بەرۋدىڭ رەسپۋبليكالىق وقۋ-ادىستەمەلىك ورتالىعى.
دەنساۋلىق ساقتاۋ مينيسترلىگىندە دە وزگەرىستەر كۇتىلۋدە: رەسپۋبليكالىق قان ورتالىعى ترانسفۋزيولوگيا عىلىمي-وندىرىستىك ورتالىعىمەن بىرىكتىرىلەدى، ال «الاتاۋ» بالالار كلينيكالىق ءساناتوريى كۋرورتولوگيا جانە مەديسينالىق وڭالتۋ عىلىمي-زەرتتەۋ ينستيتۋتىنا قوسىلادى.
جاساندى ينتەللەكت جانە سيفرلىق دامۋ مينيسترلىگىندە «عارىشتىق تەحنيكا جانە تەحنولوگيالار ينستيتۋتى» ج ش س الدىمەن اكسيونەرلىك قوعامعا اينالدىرىلادى، سودان كەيىن «قازاقستان عارىش ساپارى» ۇلتتىق كومپانياسى» اق-نا قوسىلادى.
قاۋلىمەن تولىق تاراتىلۋعا جاتاتىن زاڭدى تۇلعالاردىڭ تىزبەسى بەكىتىلدى: «Talap» ۇاق (ق ر وقۋ-اعارتۋ مينيسترلىگى)، «قولدانبالى ەتنوساياسي زەرتتەۋلەر ينستيتۋتى» ج ش س (ق ر مادەنيەت جانە اقپارات مينيسترلىگى) جانە «دوستىق ەنەرگو» اق (ق ر ەنەرگەتيكا مينيسترلىگى).
قايتا ۇيىمداستىرۋ كەزەڭ-كەزەڭىمەن جۇرگىزىلەدى. نورمالاردىڭ نەگىزگى بولىگى 2026 جىلعى 1 قىركۇيەكتەن باستاپ قولدانىسقا ەنگىزىلەدى، ال جەكەلەگەن پروسەدۋرالىق وزگەرىستەر مەن اكتيۆتەردى قايتا ۇيىمداستىرۋ جونىندەگى نورمالار 2027 جىلعى 1 قاڭتاردان، 2027 جىلعى 1 شىلدەدەن جانە 2028 جىلعى 1 ناۋرىزدان باستاپ كەزەڭ-كەزەڭىمەن كۇشىنە ەنەدى.
بۇعان دەيىن پرەزيدەنت قاسىم-جومارت توقايەۆ «قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى» جارلىققا قول قويعان بولاتىن. قۇجاتقا سايكەس، ەلدە قازاقستان رەسپۋبليكاسى قاۋىپسىزدىك كەڭەسىنىڭ اپپاراتى قۇرىلدى، ول تىكەلەي پرەزيدەنتكە باعىناتىن جانە ەسەپ بەرەتىن مەملەكەتتىك ورگان مارتەبەسىن الدى.