قازاقستان سىرتقى ىستەر مينيسترلىگىنىڭ رەسمي وكىلى جانبولات ۇسەنوۆ رەسپۋبليكاعا كىرگىسى كەلەتىن شەتەلدىكتەرگە ارنالعان ەلەكتروندى تىركەۋ جۇيەسى تۋرالى مالىمەت بەردى، دەپ حابارلايدى infohub.kz سايتى.
سپيكەردىڭ ايتۋىنشا، QazETA قۇرالى قازاقستانمەن ۆيزاسىز رەجيم جۇمىس ىستەيتىن بارلىق مەملەكەتتىڭ ازاماتتارىنا قولدانىلادى. ول بۇل باستامانى كەيدە تەك رەسەي فەدەراسياسىنىڭ ازاماتتارىنا قاتىستى دەپ تۇسىنەتىنىن اتاپ ءوتتى.
«ءسىز قازاقستان رەسەي ازاماتتارىنا ەلەكتروندى رۇقسات دەگەن قۇرال ەنگىزىپ جاتىر دەدىڭىز. جوق، تۇزەتەيىن، ءقازىر بۇل قۇرالدى قازاقستانمەن ۆيزاسىز رەجيم جۇمىس ىستەيتىن بارلىق ەلدىڭ ازاماتتارىنا ەنگىزۋ مۇمكىندىگى قاراستىرىلۋدا. تەك رەسەي فەدەراسياسىنىڭ ازاماتتارىنا عانا ەمەس»، — دەدى جانبولات ۇسەنوۆ.
جۇيە اعىمداعى جىلدىڭ سوڭىنا — كەلەسى جىلدىڭ باسىنا قاراي ىسكە قوسىلادى دەپ كۇتىلۋدە. قۇرالدى ازىرلەۋمەن ىشكى ىستەر مينيسترلىگى اينالىسىپ جاتىر. تىركەۋدىڭ اقىلى نەمەسە تەگىن بولاتىنى ازىرگە بەلگىسىز.
«تىركەۋ اقىلى ما، تەگىن بە — ونى ايتا المايمىن، بۇل جونىندە رەسمي تۇسىنىكتەمە بەرە المايمىن»، — دەپ قورىتىندىلادى سىرتقى ساياسي ۆەدومستۆو وكىلى.
بۇعان دەيىن ىشكى ىستەر مينيسترلىگى شەتەلدىكتەردىڭ قازاقستانعا كىرۋ ەرەجەلەرىن وزگەرتۋدى ۇسىنعانى حابارلانعان.