قازاقستان مەملەكەتتىك شەكارادا سيفرلىق تەحنولوگيالاردى بەلسەندى تۇردە ەنگىزىپ، ازاماتتار مەن شەتەلدىك قوناقتار ءۇشىن اۆتوماتتاندىرىلعان باقىلاۋعا باسىمدىق بەرۋدە. 2028 جىلعا قاراي وتكىزۋ پۋنكتتەرىندە 198 جاڭا Q-Gate بيومەتريالىق تەرمينالى ورناتىلادى، ال ازىرلەۋشىلەر شەتەلدىكتەردى تەكسەرۋ الگوريتمدەرىن جاساپ جاتىر، دەپ حابارلايدى infohub.kz سايتى.
«Kazdream Special Systems» ج ش س باس ديرەكتورى دۋمان سەمباەۆتىڭ ايتۋىنشا، تەرمينالدار جەلىسىن كەڭەيتۋمەن قاتار شەتەل ازاماتتارىن اۆتوماتتاندىرىلعان بايلانىسسىز باقىلاۋ الگوريتمدەرى ازىرلەنۋدە. بۇل شەكارا قاۋىپسىزدىگىن نىعايتۋعا، كوشى-قون اعىندارىن ەسەپكە الۋدى وڭتايلاندىرۋعا جانە قۇجاتتاردى تەكسەرۋ كەزىندە ادام فاكتورىن جويۋعا مۇمكىندىك بەرەدى.
سونىمەن قاتار، ەلىمىزدە eGov پورتالى ارقىلى پاسپورتتىڭ QR-كودى بويىنشا شەكارادان ءوتۋدىڭ پيلوتتىق سىناعى باستالدى — فيزيكالىق قۇجاتتى كورسەتپەي-اق.
قازىرگى ۋاقىتتا استانا مەن الماتى حالىقارالىق اۋەجايلارىن قوسا العاندا، 11 وتكىزۋ پۋنكتىندە 54 Q-Gate تەرمينالى جۇمىس ىستەيدى. جۇيە بەت بيومەترياسىن پاسپورت دەرەكتەرىمەن 15–50 سەكۋند ىشىندە سالىستىرادى، بۇل ستاندارتتى قولمەن باقىلاۋدان 4–5 ەسە جىلدام. وتكىزۋ قابىلەتى دە تاڭقالارلىق: 200 جولاۋشىعا ارنالعان رەيستى شەكاراشىلار كۇشىمەن باقىلاۋ شامامەن 30 مينۋتتى الادى، ال Q-Gate ارقىلى بۇكىل بورت 7 مينۋتتا وتەدى. تەرمينال 16 جاستان اسقان ازاماتتاردىڭ ۇقك شەكارا قىزمەتى قىزمەتكەرلەرىنە جۇگىنبەستەن بايلانىسسىز ءوتۋىن قامتاماسىز ەتەدى.
جۇيەنى 2028 جىلعا دەيىن كەڭەيتۋ اۋەجايلار مەن قۇرلىقتاعى وتكىزۋ پۋنكتتەرىنىڭ ينفراقۇرىلىمىن فيزيكالىق كەڭەيتپەي-اق، شەكارا بەكەتتەرىنىڭ وتكىزۋ قابىلەتىن بىرنەشە ەسە ارتتىرۋعا مۇمكىندىك بەرەدى.
استانا حالىقارالىق اۋەجايى 2026 جىلدىڭ شىلدەسىندە ءبىر ايدا العاش رەت 1 ميلليوننان استام جولاۋشىعا قىزمەت كورسەتتى، بۇل استانالىق اۋە گاۆانى تاريحىنداعى ەڭ جوعارى ايلىق كورسەتكىش بولدى.