قازاقستاندا جالعان ديپلوم جاساپ ۇسىنعان 20 سايتتىڭ جۇمىسى توقتاتىلدى. بۇل فاكتىلەر بويىنشا ماتەريالدار ق ر ىشكى ىستەر مينيسترلىگى مەن ق ر مادەنيەت جانە اقپارات مينيسترلىگىنە جولداندى، دەپ حابارلايدى infohub.kz.
ق ر عىلىم جانە جوعارى ءبىلىم مينيسترلىگى بۇگىندە ءوز ۇلگىسىندەگى ديپلومدار ارنايى جۇيە ارقىلى عانا قالىپتاساتىنىن ەسكە سالدى. ءار قۇجاتقا بىرەگەي ءنومىر مەن QR-كود اۆتوماتتى تۇردە بەرىلەدى، ال ديپلوم تەك تۇلەكتىڭ دەرەكتەرى جوعارى ءبىلىمنىڭ ءبىرىڭعاي پلاتفورماسىندا بولعان جاعدايدا عانا جاسالادى.
«ءوز ۇلگىسىندەگى ءبىلىم قۇجاتتارىندا بىرەگەي ءنومىر مەن QR-كود بولماسا، ولار جارامسىز بولىپ سانالادى»، — دەپ اتاپ ءوتتى ۆەدومستۆودا.
مينيسترلىكتە ديپلومدار بازاسى 1991 جىلدان بەرى بەرىلگەن قۇجاتتاردى قامتيتىنىن ءتۇسىندىردى. جۇيەگە تەك جوعارى وقۋ ورىندارىنىڭ ۋاكىلەتتى قىزمەتكەرلەرى عانا قول جەتكىزە الادى، ال ديپلوم ءنومىرى ءبىلىم الۋشى تۋرالى مالىمەتتەر نەگىزىندە اۆتوماتتى تۇردە جاسالادى.
جۇمىس بەرۋشىلەر مەن تۇلەكتەر ديپلومنىڭ ءتۇپنۇسقالىعىن جوعارى ءبىلىمنىڭ ءبىرىڭعاي پلاتفورماسىنىڭ سەرۆيسى ارقىلى تەكسەرە الادى. قۇجاتتىڭ ەلەكتروندى نۇسقاسى eGov قوسىمشاسىنىڭ «سيفرلىق قۇجاتتار» بولىمىندە دە قولجەتىمدى.
مينيسترلىك جالعان ديپلوم جاساۋ، ساتۋ جانە پايدالانۋ قىلمىستىق جاۋاپكەرشىلىككە اكەپ سوعاتىنىن ەسكە سالدى. ق ر قىلمىستىق كودەكسىنىڭ 385-بابىنا سايكەس، بۇزۋشىلارعا ايىپپۇل، تۇزەۋ جۇمىستارى، باس بوستاندىعىن شەكتەۋ نەمەسە ەكى جىلعا دەيىن باس بوستاندىعىنان ايىرۋ جازاسى قاراستىرىلعان.
بۇعان دەيىن «كۋرسيۆ» «قازاقتەلەكوم» باسشىسى باعدات ءمۋسيننىڭ بۇگىنگى تاڭدا تابىستى مانساپ ءۇشىن ءبىر عانا جوعارى ءبىلىمنىڭ جەتكىلىكسىز ەكەنىن ايتقانىن جازعان بولاتىن. ونىڭ پىكىرىنشە، ماماندار كاسىبىنە قاراماستان باعدارلامالاۋ، جاساندى ينتەللەكت جانە كومپيۋتەرلىك عىلىمداردى مەڭگەرۋى قاجەت، ويتكەنى ءدال تەحنولوگيالار مەن بەيىندىك پاندەر توعىسىندا جاڭا جاڭالىقتار مەن سۇرانىسقا يە ماماندىقتار پايدا بولادى.