قازاقستاننىڭ اۋىل شارۋاشىلىعى مينيسترلىگى جەر قاتىناستارى سالاسىنداعى قىزمەت كورسەتۋ ەرەجەلەرىن قايتا وڭدەدى. بۇل — قۇجاتتىڭ قازاق جانە ورىس تىلدەرىندەگى نۇسقالارىنداعى سايكەسسىزدىكتەردىڭ انىقتالۋىنا بايلانىستى، دەپ حابارلايدى infohub.kz سايتى.
اكىمشىلىك ىستەر جونىندەگى كاسساسيالىق سوتتىڭ مالىمەتىنشە، جەر سالاسىنداعى مەملەكەتتىك قىزمەت كورسەتۋ ەرەجەلەرىندە نورمالاردىڭ ەكىۇشتى ءتۇسىندىرىلۋى جانە تىلدىك نۇسقالار اراسىنداعى سايكەسسىزدىكتەر انىقتالعان. اتاپ ايتقاندا، كەنت نەمەسە اۋىل جەرلەرىنەن جەر تەلىمىن بەرۋ، سونداي-اق جوبالاناتىن ۋچاسكەنى ءبىرىڭعاي مەملەكەتتىك جىلجىمايتىن م ۇلىك كاداسترىنىڭ اقپاراتتىق جۇيەسى دەرەكتەرىمەن كەلىسۋ سياقتى سۇرانىسقا يە قىزمەتتەرگە قاتىستى كەلىسپەۋشىلىكتەر بولعان.
سوت زاڭعا تاۋەلدى اكتىنىڭ ماتىندەرىنىڭ بىردەي ەمەستىگى تەك تەرمينولوگياعا عانا ەمەس، سونىمەن قاتار قىزمەت كورسەتۋ تارتىبىنە، راسىمدەردىڭ مەرزىمدەرىنە، قۇجاتتار تىزبەسىنە جانە ءتىپتى الۋشىلار شەڭبەرىنە تىكەلەي اسەر ەتكەنىن انىقتادى. مۇنداي ولقىلىقتار زاڭنىڭ بىركەلكى قولدانىلماۋىنا، قۇقىقتىق بەلگىسىزدىككە جانە بەلگىلى ءبىر تاۋەكەلدەرگە جاعداي جاساعان.
قازاق جانە ورىس تىلدەرىندەگى نورماتيۆتىك قۇقىقتىق اكتىلەر قاتاڭ تۇردە تەڭتۇپنۇسقالى بولۋى ءتيىس بولعاندىقتان، سوت ۇكىمەت پەن سالالىق مينيسترلىككە جەكەشە قاۋلى شىعارعان. وسى قاۋلىنى ورىنداۋ ءۇشىن اۋىل شارۋاشىلىعى مينيسترلىگى جەدەل تۇردە جاڭا قۇقىقتىق اكت — 2026 جىلعى 3 ساۋىردەگى № 118 بۇيرىعىن ازىرلەپ، مەملەكەتتىك جانە جەرگىلىكتى اتقارۋشى ورگاندارمەن كەلىسىپ، قابىلدادى.
قابىلدانعان شارالار زاڭعا تاۋەلدى اكتىلەردىڭ نۇسقالارى اراسىنداعى ماعىنالىق جانە پروسەدۋرالىق سايكەسسىزدىكتەردى تولىعىمەن جويدى. ەندى جەر تەلىمدەرىن الۋ جانە ولاردى كەلىسۋ ءراسىمى اشىقتىق پەن قۇقىق قولدانۋدىڭ بىركەلكىلىگى قاعيداتتارىنا قاتاڭ سايكەستەندىرىلدى، سونداي-اق ازاماتتار مەن كاسىپكەرلەردىڭ قۇقىقتارى مەن زاڭدى مۇددەلەرىنىڭ سەنىمدى قورعالۋى قامتاماسىز ەتىلدى، دەپ سەندىردى سوتتا.