قازاقستاندا باعانى رەتتەۋ تىزىمىنەن 1،2 مىڭنان استام دارى-دارمەك اتاۋى الىنىپ تاستالدى. بۇل — قۇنى ءبىر ايلىق ەسەپتىك كورسەتكىشتەن (اەك) تومەن ارزان رەسەپتىلىك پرەپاراتتار. فارماسەۆتيكالىق قىزمەتتى قولداۋ جانە دامىتۋ قاۋىمداستىعىنىڭ پرەزيدەنتى مارينا دۋرمانوۆانىڭ پىكىرىنشە، باسەكەلەستىكتىڭ كۇشەيۋى وسى دارىلەردىڭ باعاسىن تومەندەتۋى مۇمكىن، دەپ حابارلايدى infohub.kz سايتى.
ونىڭ ايتۋىنشا، باعانى رەتتەۋگە جاتاتىن تىزىمدەگى اتاۋلار سانى 3 039-نان 1 827-گە دەيىن قىسقارعان. رەتتەۋدەن شىعارۋدىڭ قازىرگى كەزەڭى قۇنى 1 اەك-تەن (2026 جىلى 4 325 تەڭگە) تومەن رەسەپتىلىك پرەپاراتتاردى قامتيدى.
«نەگە 1 اەك-تەن تومەن باعا سونشا ماڭىزدى؟ سەبەبى بۇل — ارزان سەگمەنت. ءدال وسى پرەپاراتتار ودان ءارى ارزانداۋى مۇمكىن. ويتكەنى نارىق — بۇل باسەكە. ياعني، ەگەر بۇل پرەپاراتتار باعانى رەتتەۋدەن شىعارىلسا، باسەكە باعانى تومەندەتۋگە كومەكتەسەدى»، — دەپ تۇسىندىرەدى ول.
دۋرمانوۆانىڭ ايتۋىنشا، بۇل سونداي-اق وسى دارى-دارمەكتەردىڭ جەتكىزىلىم كولەمىنىڭ ۇلعايۋىنا اكەلەدى.
«بۇل دەگەنىمىز، مۇنداي دارىلەر قازاقستاندىق نارىققا كەڭ اسسورتيمەنتتە كىرەدى. تيىسىنشە، بۇل فارماسەۆتيكالىق ونەركاسىپتىڭ جانە جالپى فارمسالانىڭ دامۋىنا دا كومەكتەسەدى. سوندىقتان ءبىز دارى-دارمەكتەر ارزانداۋى مۇمكىن دەپ ايتىپ وتىرمىز»، — دەپ اتاپ ءوتتى ول.
دۋرمانوۆا دارى-دارمەك باعاسىن كەزەڭ-كەزەڭىمەن رەتتەۋدەن شىعارۋ باعىتى قازاقستان پرەزيدەنتىنىڭ 2022 جىلعى جولداۋىندا بەلگىلەنگەنىن ەسكە سالدى. ودان كەيىن «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە دارى-دارمەك باعاسىن رەتتەۋدەن شىعارۋ بولىگىندە وزگەرىستەر ەنگىزىلىپ، دەنساۋلىق ساقتاۋ سالاسىنداعى باسەكەلەستىكتى دامىتۋدىڭ جول كارتاسى ازىرلەندى.
«كۋرسيۆ» بۇعان دەيىن دەنساۋلىق ساقتاۋ مينيسترلىگى قۇنى 4 325 تەڭگەدەن تومەن پرەپاراتتاردى مەملەكەتتىك باقىلاۋدان شىعارىپ جاتقانىن جازعان.