قازاقستاندا ونەركاسىپتە قولدانىلاتىن گۋمانويدتى روبوتتار شىعارۋ جوباسى ىسكە قوسىلماق. بۇل تۋرالى infohub.kz سايتى حابارلايدى.
عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنىڭ مالىمەتىنشە، جوبا روبوتوتەحنيكانى، جاساندى ينتەللەكتتى جانە ونەركاسىپتىك ءوندىرىستى بىرىكتىرەدى. ونىڭ ماقساتى — ەلدە مەنشىكتى تەحنولوگيالىق جانە ينجەنەرلىك قۇزىرەتتەردى دامىتۋ.
ۆەدومستۆونىڭ ايتۋىنشا، جوبا حالىقارالىق AgiBot كومپانياسىمەن بىرلەسىپ جۇزەگە اسىرىلادى. بۇل كومپانيا گۋمانويدتى روبوتتاردى ازىرلەۋ مەن وندىرۋگە، سونداي-اق Embodied AI (ىسكە اسىرىلعان جاساندى ينتەللەكت) سالاسىنداعى شەشىمدەرگە ماماندانعان. سەرىكتەستىك اياسىندا قازاقستاندا تەحنولوگيالاردى لوكاليزاسيالاۋ، ينجەنەرلىك قۇزىرەتتەردى دامىتۋ، عىلىمي زەرتتەۋلەر جۇرگىزۋ جانە ماماندار دايارلاۋ كوزدەلگەن.
عىلىم جانە جوعارى ءبىلىم ءمينيسترى ساياسات نۇربەك ۆەدومستۆونىڭ مىندەتى دايىن تەحنولوگيالىق شەشىمدەردى ەنگىزۋمەن شەكتەلمەي، قازاقستاندا مەنشىكتى ينجەنەرلىك جانە عىلىمي قۇزىرەتتەردى قالىپتاستىرۋ ەكەنىن اتاپ ءوتتى. «گۋمانويدتى روبوتتار ءوندىرىسى ۋنيۆەرسيتەتتەردى، عالىمداردى جانە يندۋستريانى ءبىرتۇتاس تەحنولوگيالىق تىزبەككە بىرىكتىرەتىن الاڭعا اينالۋى ءتيىس. بۇل — ماماندار دايارلاۋ مەن عىلىمي زەرتتەۋلەردەن باستاپ تەحنولوگيالىق شەشىمدەردى ازىرلەۋگە جانە ولاردى ونەركاسىپتە قولدانۋعا دەيىنگى تولىق سيكل. ءبىلىم، عىلىم جانە ءوندىرىستى ينتەگراسيالاۋدىڭ ءدال وسىنداي مودەلىن كەڭەيتۋدى كوزدەپ وتىرمىز»، — دەدى نۇربەك.