كەيبىر قازاقستاندىقتار اقىلى تۇردە الەۋمەتتىك تولەم نەمەسە جاردەماقى راسىمدەپ بەرەمىن دەپ ۋادە ەتەتىن «كومەكشىلەردىڭ» قىزمەتىنە جۇگىنەدى. قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى ەسكەرتكەندەي، مۇنداي ارەكەتتەر اقشا جوعالتۋعا، ءتىپتى جاۋاپكەرشىلىككە تارتىلۋعا اكەپ سوعۋى مۇمكىن، دەپ حابارلايدى infohub.kz سايتى.
قازاقستاندا مەملەكەتتىك جاردەماقىلار مەن الەۋمەتتىك تولەمدەر ءارتۇرلى جاعدايلاردا جانە وعان زاڭدى قۇقىعى بار ازاماتتارعا عانا تاعايىندالادى. مىسالى، الەۋمەتتىك تولەمدەر مەملەكەتتىك الەۋمەتتىك ساقتاندىرۋ قورىنا (ءماسق) اۋدارىم تولەنەتىن رەسمي جۇمىس ىستەيتىن قازاقستاندىقتارعا عانا قولجەتىمدى.
الايدا، ق ر ەڭبەك جانە حالىقتى الەۋمەتتىك قورعاۋ مينيسترلىگى اتاپ وتكەندەي، الەۋمەتتىك جەلىلەردە ازاماتتارعا الەۋمەتتىك تولەمدەردى راسىمدەۋگە، ولاردى ۇزارتۋعا نەمەسە جۇمىستان ايىرىلۋ بويىنشا تولەمدەردى الۋعا كومەكتەسۋ تۋرالى ۇسىنىستار مەزگىل-مەزگىل كەلىپ تۇرادى. ءىس جۇزىندە مۇنداي ۇسىنىستار ءقاۋىپتى جانە ءبىرقاتار جاعىمسىز سالدارعا اكەلۋى مۇمكىن.
ەڭ الدىمەن، بۇل – اقشا جوعالتۋ: الەۋمەتتىك تولەمدەردى تاعايىنداۋ كەزىندە دەلدالدار قاجەت ەمەس، مۇنداي جاعدايدا قازاقستاندىقتار «اۋاعا» اقشا تولەيدى. سونىمەن قاتار، جەكە دەرەكتەردىڭ تارالۋ ءقاۋپى بار – بوگدە ادامدار كۋالىك دەرەكتەرىن جانە باسقا دا جەكە اقپاراتتى الادى. تاعى ءبىر ءقاۋىپ بانك شوتىنا قاتىستى: كارتا دەرەكتەرىن جانە قۇپيا بانكتىك اقپاراتتى بەرۋگە بولمايدى، ويتكەنى بۇل قاراجاتتىڭ ۇرلانۋىنا اكەلۋى مۇمكىن. سونداي-اق، قولجەتىمدىلىكتى جوعالتۋ ءقاۋپى بار – SMS-كودتار مەن ەلەكتروندىق سيفرلىق قولتاڭبانى (ەسق) بەرۋ سيفرلىق سەرۆيستەرگە قولجەتىمدىلىكتى قاۋىپكە قويۋى مۇمكىن.
بۇدان بولەك، ۆەدومستۆو اتاپ كورسەتكەندەي، زاڭسىز الىنعان اقشانى قايتارۋعا تۋرا كەلەدى، ال جالعان جۇمىسقا ورنالاسۋ نەمەسە كورىنەۋ جالعان مالىمەتتەر بەرۋ ءۇشىن ازاماتتار جاۋاپكەرشىلىككە تارتىلۋى مۇمكىن.
تەك 2025 جىلدىڭ وزىندە قازاقستاننىڭ 12 وڭىرىندە الەۋمەتتىك تولەمدەردى زاڭسىز الۋعا بايلانىستى 30-دان استام قىلمىستىق ءىس قوزعالدى. بەس وڭىردە سوت جەتى ۇكىم شىعاردى.
الەۋمەتتىك تولەمدى راسىمدەۋ ءۇشىن كەپىلدى تۇردە الۋعا، جەدەلدەتۋگە نەمەسە ۇزارتۋعا ۋادە ەتەتىن دەلدالدارعا اقى تولەۋدىڭ قاجەتى جوق ەكەنىن ەستە ۇستاعان ءجون. قازاقستاندىقتار مەملەكەتتىك قولداۋ الۋعا ءوز بەتىنشە ءوتىنىش بەرە الادى، ونى ءتىپتى حالىققا قىزمەت كورسەتۋ ورتالىعىنا جەكە كەلمەي-اق جاساۋعا بولادى.
اۋقىمدى ءتۇسىنۋ ءۇشىن: 2026 جىلدىڭ قاڭتارىنان تامىزىنا دەيىن ءماسق-تان الەۋمەتتىك تولەمدەردى 1،1 ملن-عا جۋىق ازامات جالپى سوماسى 527 ملرد تەڭگەگە الدى.
ال جاقىندا ءبىز قازاقستاندا «جۇمىسسىزدىق بويىنشا جاردەماقى» تاعايىنداۋ تەتىگى قالاي وزگەرەتىنىن اڭگىمەلەگەن بولاتىنبىز.