قوستانايدا دارىگەرلەر مۇمكىن ەمەس ءىستى تىندىردى: دەنەسىنەن 27 مىڭ ۆولتتان استام توك وتكەن 15 جاسار بالانىڭ ءومىرىن ساقتاپ قالدى. وقيعا ءجاسوسپىرىمنىڭ ادەمى سۋرەتكە ءتۇسۋ ءۇشىن تەمىرجول ۆاگونىنا شىعۋى كەزىندە بولعان، دەپ حابارلايدى infohub.kz سايتى.
قوستاناي وبلىستىق بالالار اۋرۋحاناسىنىڭ تراۆماتولوگ-ورتوپەدى ميراس ەلجاسوۆتىڭ ايتۋىنشا، وقيعا 25 ماۋسىمدا بولعان. بالا اۋرۋحاناعا وتە اۋىر جاعدايدا جەتكىزىلگەن.
«ول تەمىرجول ۆاگونىنا شىعىپ، الەۋمەتتىك جەلىگە سالۋ ءۇشىن سۋرەتكە تۇسكىسى كەلگەن. سونىڭ سالدارىنان ەلەكتر جاراقاتىن الىپ، دەنەسىنىڭ 60 پايىزىنان استامى قاتتى كۇيىك شالعان. ونى دەرەۋ رەانيماسيا بولىمىنە جاتقىزدى، وندا ءبىر جارىم اي جاتتى. باقىتىمىزعا وراي، قول-اياعىن ساقتاپ قالۋعا مۇمكىندىك تۋدى»، — دەدى ەلجاسوۆ.
دارىگەردىڭ ايتۋىنشا، الەمدىك جانە رەسپۋبليكالىق ستاتيستيكاعا سايكەس، مۇنداي جاراقات العان بالالاردىڭ 90 پايىزى العاشقى اپتادا كوز جۇمادى، الايدا بۇل ءجاسوسپىرىم امان قالدى. جاقىندا ونى رەانيماسيادان جاي پالاتاعا اۋىستىردى.
بالانىڭ اجەسى كوز جاسىن تىيا الماي، سول كۇنى وعان پوليسيا قىزمەتكەرلەرى قوڭىراۋ شالىپ، قايعىلى جاعدايدى حابارلاعانىن ايتتى. ول بۇل تەلەفون الاياقتارى دەپ ويلاپ، تۇتىكتى تاستاعان. ءبىراق بىرنەشە مينۋتتان كەيىن باقىتسىزدىقتىڭ شىنىمەن دە ولاردىڭ ۇيىنە كەلگەنىن تۇسىنگەن.
ءجاسوسپىرىمنىڭ ءوزى دە سول كۇنگى وقيعانى ەسكە الىپ: «ءبىز دوستارىممەن ۇيگە قىسقا جولمەن بارۋدى ءجون كورىپ، تەمىرجولمەن جۇردىك. پويىزدى كورىپ، سۋرەتكە ءتۇسۋ يدەياسى كەلدى. مەن ۆاگوننىڭ توبەسىنە وتىردىم، دوسىم مەنى سۋرەتكە ءتۇسىردى. كەيىن نە بولعانىن ماعان دوسىم ايتىپ بەردى. مەن تۇرعاندا ەلەكتر دوعاسى سوقتى. سونىڭ سالدارىنان سەكىرىپ، 2 مەترگە ۇشىپ كەتتىم. ەسىمنەن تانىپ قالدىم، ەسىمە كەلگەندە ۇيگە بارعىم كەلدى، ءبىراق جەدەل جاردەم دارىگەرلەرى اۋىرسىنۋدى باساتىن ءدارى ەگىپ، اۋرۋحاناعا اپاردى. قابىلداۋ بولىمىندە ءبارىنىڭ ماعان ۇلكەن كوزبەن قاراعانى ەسىمدە، سودان كەيىن ەسىمنەن تانىپ قالدىم»، — دەدى.
باسىلىمنىڭ مالىمەتىنشە، سول سۋرەت ساقتالىپ قالعان، ءتىپتى بالا ونى الەۋمەتتىك جەلىگە جاريالاعان. دارىگەرلەردىڭ ءومىردى ساقتاۋ جولىنداعى اۋىر جۇمىسى ءبىر جارىم ايعا سوزىلدى. ءجاسوسپىرىم جۋرناليستەرگە تاڭداعان ماماندىعىن وزگەرتۋگە شەشىم قابىلداعانىن ايتتى: وقيعادان ەكى كۇن بۇرىن 9-سىنىپ تۇلەگى ەلەكتريك ماماندىعىنا قۇجات تاپسىرعان ەدى. ەندى ول مەديسينا سالاسىنا بارعىسى كەلەتىنىن ايتتى.