جالعىز يەسى سەيىتجان ەسىموۆ بولىپ تابىلاتىن «قوستاناي جولدارى» قۇرىلىس كومپانياسى 2025 جىلدىڭ قورىتىندىسى بويىنشا 2،4 ملرد تەڭگە تازا پايدا تاپتى. ءبىر جىل بۇرىن بۇل كورسەتكىش 909 ملن تەڭگە ەدى، ياعني ءبىر جىلدا 2،6 ەسە ءوستى. بۇل تۋرالى كومپانيانىڭ قارجىلىق ەسەپتىلىگىندە جازىلعان، دەپ حابارلايدى infohub.kz سايتى.
قوستانايدا تىركەلگەن «قوستاناي جولدارى» كومپانياسى تولىعىمەن الماتىدا تۇراتىن 68 جاستاعى سەيىتجان ەسىموۆكە تيەسىلى. ول — قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ جيەنى، 75 جاستاعى احمەتجان ەسىموۆتىڭ ءىنىسى. احمەتجان ەسىموۆ ۇزاق جىلعى مانسابىندا قازاقستاننىڭ بەلگياداعى، نيدەرلاندىداعى جانە ليۋكسەمبۋرگتەگى ەلشىسى، اۋىل شارۋاشىلىعى ءمينيسترى، ۆيسە-پرەمەر، الماتى اكىمى بولدى، «استانا ەكسپو-2017» ۇلتتىق كومپانياسىن، «سامۇرىق-قازىنانى» باسقارىپ، وزگە دە لاۋازىمداردا قىزمەت اتقاردى.
2025 جىلى «قوستاناي جولدارىنىڭ» ءتۇسىمى 14،7 ملرد تەڭگەگە جەتتى، ال 2024 جىلى ول 9،6 ملرد تەڭگە بولىپ، 1،5 ەسە ارتقان. كومپانيانىڭ قارجىلىق كىرىسى 26،4 ملن تەڭگەدەن 118،6 ملن تەڭگەگە ءوسىپ، 4،5 ەسە كوبەيدى. 2025 جىلدىڭ سوڭىندا بولىنبەگەن پايدا 6،6 ملرد تەڭگەنى قۇرادى.
كومپانيا تۇسكەن پايدادان ديۆيدەندتەردى تۇراقتى تۇردە تولەپ وتىرادى. 2025 جىلى ولاردىڭ مولشەرى 410 ملن تەڭگە، 2024 جىلى – 205 ملن تەڭگە بولدى.
«قاراعاندى جولدارىنىڭ» نەگىزگى قىزمەت تۇرلەرى – جولدار، اۋەجايلار مەن سپورت قۇرىلىستارىن سالۋ، سونداي-اق باسقا دا جۇمىستار. كومپانيانىڭ بىرنەشە فيليالى بار، ونىڭ ىشىندە قاراعاندىداعى جوندەۋ-قۇرىلىس باسقارماسى، قاراعاندى وبلىسىنداعى بوتاقارا كەنتىندەگى جول-پايدالانۋ ۋچاسكەسى، قاراعاندى وبلىسىنداعى وساكاروۆكا كەنتىندەگى جول-پايدالانۋ ۋچاسكەسى جانە اقمولا وبلىسىنداعى دەرجاۆينسك قالاسىنداعى فيليال.
اشىق دەرەكتەرگە سايكەس، بيىل كومپانيا «قوندىباي» وتكىزۋ پۋنكتىنە اپاراتىن دەنيسوۆكا – ءجىتىقارا – مۇكتىكول – رەسەي فەدەراسياسىنىڭ شەكاراسى باعىتىنداعى جولدىڭ 42 كم ۋچاسكەسىن جوندەۋگە قاتىسقان.