قازاقستان پرەمەر-مينيسترى ولجاس بەكتەنوۆ ۇكىمەت وتىرىسىندا جىلۋ ماۋسىمى بەلگىلەنگەن مەرزىمدە باستالۋى ءتيىس ەكەنىن ايتىپ، ءبىرقاتار تاپسىرما بەردى، دەپ حابارلايدى infohub.kz سايتى.
«ەنەرگيا كاسىپورىندارىنىڭ جىلۋ ماۋسىمىنا دايىندىعى بويىنشا پاسپورتتار الۋ جۇمىستارى باستالدى. اكىمدەرگە ەنەرگيا نىساندارىنىڭ قىسقا دايىندىعىن باعالاۋ جونىندەگى كوميسسيالاردىڭ جۇمىسىنا جەكە قاتىسۋدى تاپسىرامىن. (…) ەگەر جىلۋ ماۋسىمىنا دايىندىق پاسپورتىنسىز كىرسە، ءتيىستى باسشىلار جاۋاپكەرشىلىككە تارتىلادى»، — دەدى ولجاس بەكتەنوۆ.
«سامۇرىق-ەنەرگو» كومپانياسىنا پرەمەر جوندەۋ جۇمىستارىن ۋاقىتىلى اياقتاپ قانا قويماي، جاڭا قۋاتتاردى پايدالانۋعا بەرۋدى دە تاپسىردى. KEGOC كومپانياسىنا — جەلىلەر مەن قوسالقى ستانسيالاردى جوندەۋ كەستەسىن ساقتاۋدى.
ەنەرگەتيكا مينيسترلىگى مەن اكىمدىكتەرگە پرەمەر 1 قىركۇيەككە دەيىن وڭىرلەرگە الەۋمەتتىك مازۋت جەتكىزۋ كەستەسىن بەكىتۋدى تاپسىردى. قتج-مەن بىرلەسىپ، بەكىتىلگەن كەستە مەن كولەمدەرگە سايكەس ەنەرگيا نىساندارىنا كومىر مەن مازۋتتى ۋاقتىلى جەتكىزۋ شارالارىن قابىلداۋ قاجەت.
«حالىقتى جانە كوممۋنالدىق-تۇرمىستىق سەكتوردى كومىرمەن ۋاقتىلى قامتاماسىز ەتۋ ماسەلەسىن ەرەكشە اتاپ وتەمىن. كومىردى ءوندىرۋ مەن تيەۋدەن باستاپ، حالىققا ساتۋعا دەيىنگى بۇكىل تىزبەكتى قاتاڭ باقىلاۋ قاجەت. وڭىرلەردە ۇزىلىستەرگە، باعانىڭ نەگىزسىز وسۋىنە جانە جاساندى اجيوتاجعا جول بەرمەۋ كەرەك»، — دەدى بەكتەنوۆ.
ارتتا قالعان اكىمدەرگە پرەمەر بار پروبلەمالاردى جەدەل جويۋدى تاپسىردى.
«ونەركاسىپ جانە قۇرىلىس مينيسترلىگىنە، وڭىرلەردىڭ اكىمدىكتەرىنە 1 قىركۇيەككە دەيىن ءبىلىم بەرۋ جانە دەنساۋلىق ساقتاۋ نىساندارىنىڭ تولىق دايىندىعىن قامتاماسىز ەتۋدى تاپسىرامىن. اعارتۋ، عىلىم جانە دەنساۋلىق ساقتاۋ مينيسترلىكتەرى دە بۇل ماسەلەنى باقىلاۋعا السىن.
سولتۇستىك، ورتالىق جانە شىعىس وڭىرلەر بويىنشا بارلىق ينجەنەرلىك ينفراقۇرىلىم مەن تۇرعىن ۇي-كوممۋنالدىق شارۋاشىلىق نىساندارى 15 قىركۇيەككە دەيىن، ال قالعان وڭىرلەردە 15 قازانعا دەيىن جىلۋ بەرۋگە تولىق دايىن بولۋى ءتيىس»، — دەدى بەكتەنوۆ.
سونىمەن قاتار، پرەمەر-مينيستر جىلۋ ماۋسىمى قارساڭىندا ەنەرگيا نىساندارىن جوندەۋدىڭ بۇزىلۋىنا جول بەرگەن باسشىلاردى جازالاۋدى تاپسىردى.