مادريدتىك «رەال» فۋتبولشىسى راۋل اسەنسيو ماس كۇيىندە كولىك جۇرگىزگەنى ءۇشىن جازاعا تارتىلدى: وعان ءىرى كولەمدە ايىپپۇل سالىنىپ، جۇرگىزۋشى كۋالىگىنەن ۋاقىتشا ايىرىلدى، دەپ حابارلايدى infohub.kz سايتى.
ريا نوۆوستي سپورتتىڭ يسپاندىق Canarias7 گازەتىنە سىلتەمە جاساپ حابارلاۋىنشا، وقيعا 16 تامىزدا گران-كاناريا ارالىنىڭ وڭتۇستىگىندە بولعان. 23 جاستاعى سپورتشى Porsche كولىگىن باسقارىپ كەلە جاتىپ، پوليسيا توقتاتقان. تەكسەرۋ كەزىندە ونىڭ دەمىنەن 0،90 مگ/ل الكوگول انىقتالعان، بۇل رۇقسات ەتىلگەن 0،25 مگ/ل نورمادان ايتارلىقتاي جوعارى.
ماس كۇيىندە كولىك جۇرگىزگەنى ءۇشىن سوت اسەنسيونى 14،4 مىڭ ەۋرو (7 ميلليون تەڭگەدەن استام) ايىپپۇل تولەۋگە جانە 8 ايعا جۇرگىزۋشى كۋالىگىنەن ايىرۋعا ۇكىم شىعاردى.
سونىمەن قاتار، الداعى كۇندەرى فۋتبولشى 2023 جىلعى وقيعاعا بايلانىستى تاعى ءبىر ءىس بويىنشا سوت الدىنا بارادى. تەرگەۋ نۇسقاسى بويىنشا، «رەالدىڭ» ءۇش تاربيەلەنۋشىسى كانار ارالدارىنداعى قوناقۇيدە ەكى قىزبەن بولعان جاقىن كەزدەسۋدى بەينەجازباعا ءتۇسىرىپ، كەيىن بۇل ماتەريالداردى قاتىسۋشىلاردىڭ كەلىسىمىنسىز تاراتقان. ءتۇسىرىلىم كەزىندە قىزداردىڭ ءبىرى 16 جاستا بولعان.
ءىس ماتەريالدارى بويىنشا، اسەنسيو كەزدەسۋگە قاتىسپاعان، الايدا باسقا قاتىسۋشىلاردان بەينەجازبانى سۇراپ الىپ، ونى ءۇشىنشى تۇلعالارعا كورسەتكەن، سودان كەيىن فايلدى جويعان. يسپانيا پروكۋراتۋراسى بۇعان دەيىن سوتقا ايىپتاۋ قورىتىندىسىن جولداپ، اسەنسيونى جەكە ومىرگە قولسۇعىلماۋشىلىقتى بۇزدى دەپ 2،5 جىلعا باس بوستاندىعىنان ايىرۋدى سۇراعان. قالعان ءۇش ايىپتالۋشىعا كامەلەتكە تولماعاننىڭ قاتىسۋىمەن پورنوگرافيالىق ماتەريالدار تاراتقانى ءۇشىن 4 جىل 7 ايعا دەيىن باس بوستاندىعىنان ايىرۋ جازاسى ءقاۋىپ ءتونىپ تۇر.
راۋل اسەنسيو — «رەال» اكادەمياسىنىڭ تۇلەگى، نەگىزگى قۇرامدا 2024 جىلى دەبيۋت جاساعان.