ۇلتتىق يادرولىق زەرتتەۋ ۋنيۆەرسيتەتى «ميفي» ماماندارى جۇمىس ايماعىنداعى اۋاداعى ءقاۋىپتى قوسىلىستاردىڭ كونسەنتراسياسىن انىقتاي الاتىن ءپورتاتيۆتى بەيدج جاساپ شىعاردى. قۇرىلعى الەۋەتتى زياندى زاتتارمەن جۇمىس ىستەيتىن كاسىپورىن قىزمەتكەرلەرىنە ارنالعان، دەپ حابارلايدى infohub.kz سايتى.
مەدالونعا ۇقسايتىن قۇرىلعىنى اۋىسىم بويى تاعىپ ءجۇرۋ كوزدەلەدى. ول ەكى رەجيمدە جۇمىس ىستەيدى. ءبىرىنشى جاعدايدا بەيدج اۋانى ۇزدىكسىز باقىلاپ، ءقاۋىپتى كومپونەنت انىقتالعان كەزدە ديسپەچەرگە دەرەۋ سيگنال جىبەرەدى. ەكىنشى رەجيمدە قۇرىلعى ءپاسسيۆتى جيناقتاعىش رەتىندە جۇمىس ىستەيدى: ىشىنە اۋاداعى قوسپالاردى سىڭىرەتىن ابسوربەنت ورنالاستىرىلعان. جۇمىس كۇنى اياقتالعان سوڭ جينالعان زاتتار ارنايى دەتەكتورلار ارقىلى الىنىپ، تالدانادى. بۇل قىزمەتكەردىڭ قانداي قوسىلىستارمەن جانە قانداي مولشەردە جۇمىس ىستەگەنىن انىقتاۋعا مۇمكىندىك بەرەدى.
جوبا جەتەكشىسى يۋليا شالتاەۆانىڭ ايتۋىنشا، قازىرگى گازواناليزاتورلاردىڭ كوپشىلىگى بەلسەندى تيپكە جاتادى، ياعني ولاردىڭ داچيكتەرى اۋانى ۇنەمى تالدايدى. ميفي ازىرلەمەسىنىڭ ءبىر نۇسقاسى ءپاسسيۆتى كارتريدج بولىپ تابىلادى، ول وزدىگىنەن تالداۋ جۇرگىزبەيدى، تەك زياندى زاتتاردى جينايدى. جيناقتالعان ماتەريالدى زەرتتەۋ اۋىسىم اياقتالعاننان كەيىن جۇزەگە اسىرىلادى. بۇل ءتاسىل قۇرىلعىنى ارزانىراق جانە قولجەتىمدى ەتەدى.
عالىمداردىڭ جوسپارىندا — قۇرىلعىلاردان الىنعان دەرەكتەردى ەڭبەك جاعدايلارىن باقىلاۋدىڭ فەدەرالدى اقپاراتتىق جۇيەلەرىنە ينتەگراسيالاۋ. سىناقتار اياقتالعاننان كەيىن ازىرلەمەنى كاسىپورىنداردا ەنگىزۋ جوسپارلانۋدا.
بۇعان دەيىن قازاقستاندا 2026 جىلدىڭ 28 شىلدەسىنەن باستاپ جوعارى ءقاۋىپ توبىنداعى ادامدارعا، ونىڭ ىشىندە زياندى ءوندىرىس قىزمەتكەرلەرىنە وكپە قاتەرلى ىسىگىنە تەگىن تەكسەرۋ باستالعانى حابارلانعان بولاتىن.