«رەسپۋبليكا» قارجى حولدينگى 2025 جىلى 1،6 ميلليارد تەڭگە تازا پايدا تاپتى، دەپ حابارلايدى infohub.kz.
سالىستىرۋ ءۇشىن، ءبىر جىل بۇرىن پايدا 2،9 ميلليارد تەڭگە بولعان ەدى. حولدينگتىڭ بولىنبەگەن پايداسى 2025 جىلدىڭ سوڭىندا 5،9 ميلليارد تەڭگەگە جەتتى. 2025 جىلى حولدينگ ەنشىلەس قۇرىلىمداردان 1،7 ميلليارد تەڭگە ديۆيدەند الدى (2024 جىلى – 1،2 ميلليارد).
«رەسپۋبليكا» قارجى حولدينگىنىڭ 2025 جىلدىڭ سوڭىنداعى ءىرى اكسيونەرلەرى: ەركىن كوشكىنبايەۆ (68،1%) جانە Successful Investment Trust (15،81%) بولدى. حولدينگ باسقارما ءتوراعاسى الەكساندر ماناەنكو 0،29% اكسياعا يەلىك ەتتى. Successful Investment Trust كومپانياسىنىڭ دا تۇپكى يەسى – ەركىن كوشكىنبايەۆ.
حولدينگ بىرنەشە ەنشىلەس كومپانيانى باقىلايدى: RPS Asia (قازاقستان، باعدارلامالىق جاساقتاما ازىرلەۋ) – 100%، «يۆس» (قازاقستان، باعدارلامالىق جاساقتاما ازىرلەۋ) – 100%، «بىرىككەن لەزدىك تولەمدەر جۇيەسى» (قىرعىزستان، باعدارلامالىق جاساقتاما ازىرلەۋ) – 100%، «تولەم ورتالىعى» (قىرعىزستان، باعدارلامالىق جاساقتاما ازىرلەۋ) – 100%.
ەسەپتىلىكتە «تولەم ورتالىعى» كومپانياسىنىڭ بالانستىق قۇنى تولىعىمەن قۇنسىزدانعانى، سەبەبى قىرعىز كومپانياسىن تاراتۋ ءراسىمى باستالعانى ايتىلعان. وعان سالىنعان ينۆەستيسيالار 2024 جىلدىڭ سوڭىندا 1 ميلليارد تەڭگەگە باعالانعان. كومپانيا اكتيۆتەرىن ساتىپ، نەسيەلەر، قارىزدار جانە باسقا دا بورىشتار بويىنشا مىندەتتەمەلەرىن تولىق وتەگەن.
RPS Asia كومپانياسى قازاقستان ۇلتتىق بانكىنىڭ تولەمدەر جۇرگىزۋ، ەلەكتروندى اقشا شىعارۋ جانە ءامياندار قۇرۋ ليسەنزياسىنا يە. Yurta برەندى اياسىندا RPS Asia بۇكىل ەكوجۇيەنىڭ تولەم شليۋزىنە اينالدى. ول ءموبيلدى قوسىمشا جانە Visa ۆيرتۋالدى كارتاسى، Apple Pay، Samsung Pay جانە Android Pay قولداۋى بار ەلەكتروندى ءاميان ارقىلى تولەم ترانزاكسيالارىن جىبەرەدى.
«بىرىككەن لەزدىك تولەمدەر جۇيەسى» قىرعىزستاندا Onoi برەندىمەن 800-دەن استام تەرمينال جانە 1000-نان استام تولەم قابىلداۋ پۋنكتىنە يە. ول كۇندەلىكتى قىزمەتتەرگە اقى تولەۋگە مۇمكىندىك بەرەدى. بۇل سەرۆيس قىرعىزستانداعى ەڭ ءىرى ءۇش تولەم جۇيەسىنىڭ بىرىنە كىرەدى.
الماتىدا تىركەلگەن حولدينگتە 2025 جىلى 10 ادام جۇمىس ىستەسە، 2024 جىلى توعىز ادام قىزمەت ەتكەن.