شوسسە ۆەلوسپورتىنان ازيا ويىندارىنىڭ تاريحي التىن مەدالىن جەڭىپ العان ريناتا سۇلتانوۆا تۋعان جەرىنە ورالدى: بۇگىن استانا اۋەجايىندا ازيادا-2026 چەمپيونىن قارسى الدى، دەپ حابارلايدى infohub.kz سايتى.
سپورتشىنى قازاقستان رەسپۋبليكاسى تۋريزم جانە سپورت مينيسترلىگىنىڭ وكىلدەرى، سونداي-اق دوستارى، تۋعان-تۋىستارى مەن جانكۇيەرلەرى قۇتتىقتادى.
«جەڭىسكە جەتۋىمە كۇندەلىكتى جاتتىعۋلار مەن وزىممەن جۇمىس ىستەۋ كومەكتەستى. ارينە، ازيادادا بىردەن ەكى مەدال جەڭىپ العانىما قۋانىشتىمىن. ەڭ الدىمەن، شوسسە ۆەلوسپورتىندا جەڭىسكە جەتۋدى ماقسات ەتىپ قويدىم جانە وعان قول جەتكىزدىم. مەنى قولداعان بارلىق ادامدارعا زور راحمەت! شىنىمدى ايتسام، بۇگىن اۋەجايدا سونشا جانكۇيەر بولادى دەپ، پاۆلوداردان دوستارىمنىڭ ارنايى كەلەدى دەپ كۇتپەپپىن. وتە قۋانىشتىمىن»، — دەدى سۇلتانوۆا.
بۇعان دەيىن «كۋرسيۆ» جازعانداي، قازاقستاندىق ۆەلوشاباندوز ريناتا سۇلتانوۆا ترەكتەگى ومنيۋمدا ازيا ويىندارى-2026-نىڭ كۇمىس جۇلدەگەرى اتاندى. ءتورت ديسيپلينا قورىتىندىسى بويىنشا ول 133 ۇپاي جيناپ، تەك جاپوندىق يۋمي كادزيحاراعا عانا جول بەردى.
سۇلتانوۆا ءۇشىن بۇل ازيادا-2026-نىڭ ەكىنشى مەدالى. 20 قىركۇيەكتە قازاقستاندىق سپورتشى شوسسەدە جەكە ۋاقىتقا جۇگىرۋ جارىسىندا جەڭىسكە جەتىپ، قۇراماعا اعىمداعى ويىنداردىڭ العاشقى التىنىن اكەلدى.
ەسكە سالايىق، جاپونيادا XX جازعى ازيا ويىندارى اياقتالدى. قازاقستان قۇراماسى 84 مەدال — 12 التىن، 24 كۇمىس جانە 48 قولا — جەڭىپ الىپ، 46 قاتىسۋشى ەلدىڭ ىشىندە جالپىكوماندالىق ەسەپتە سەگىزىنشى ورىنعا تۇراقتادى.
2023 جىلى حانچجوۋدا وتكەن ويىنداردا قازاقستان 11-ورىن العان بولاتىن. وسىلايشا، وتكەن ازيادامەن سالىستىرعاندا كوماندا ءۇش ساتىعا كوتەرىلىپ، التىن مەدال سانىن ارتتىردى. سونىمەن قاتار، قازاقستان قۇراماسى اعىمداعى ويىنداردا وليمپيادالىق ديسيپلينالاردا ءبىرقاتار تاريحي ناتيجەلەرگە قول جەتكىزدى.