كريشتيانۋ رونالدۋ مەن دجوردجينا رودريگەستىڭ الداعى ۇيلەنۋ تويى تۋرالى باسپاسوزدە تاراعان اقپاراتتان رۋحتانعان مىڭداعان جانكۇيەر پورتۋگاليانىڭ مادەيرا ارالىنداعى كافەدرالدى سوبورعا جينالدى. الايدا ولار جۇلدىزدى جۇپتىڭ ورنىنا مۇلدەم باسقا ادامداردىڭ نەكە قيۋ راسىمىنە كۋا بولدى، دەپ حابارلايدى infohub.kz.
Sports.ru-دىڭ حابارلاۋىنشا، رونالدۋ مەن رودريگەستىڭ قۇدالىعى جاريالانعاننان كەيىن ب ا ق توي 8 تامىزدا مادەيراداعى كافەدرالدى سوبوردا وتەتىنىن جازدى. بەلگىلەنگەن كۇنى شىركەۋ الدىنا ۇلكەن توپ جينالدى: جانكۇيەرلەر مەن قىزىققاندار اتاقتى جۇپتىڭ سالتاناتىن كورۋگە ۇمىتتەندى.
كەلىنشەك وتىرعان كونە Rolls-Royce سوبور كىرە بەرىسىنە كەلگەندە، جۇرت ءوز ءساتىن كۇتكەنىنە تولىق سەنىمدى بولدى. قولىندا تەلەفوندارى بار ادامدار كولىكتى قورشاپ الدى، كەيبىرەۋلەر ءتىپتى رونالدۋدىڭ تەگى جازىلعان فۋتبولكالار مەن ونىڭ بەينەسى سالىنعان ماسكالار كيىپ كەلدى. الايدا كەلىنشەك كولىكتەن تۇسكەندە، قوناقتاردىڭ ءبىرى «بۇل دجوردجينا ەمەس» دەپ ايقايلاپ، باستالعان ابىگەرلىكتى توقتاتۋعا تىرىستى.
كوپ ۇزاماي سوبوردا فابيو راموس پەن فاتيما نيكول كۋنيا تەيشەيرا — فرانسيادا تۇراتىن مادەيرالىق جۇپتىڭ نەكە قيۋ ءراسىمى ءوتىپ جاتقانى بەلگىلى بولدى. جاستاردىڭ دوستارى مەن تۋىستارى ىشكە كىرۋ ءۇشىن توبىردى جارىپ وتۋگە ءماجبۇر بولدى. كافەدرالدى سوبوردىڭ ءدىني قىزمەتكەرى ماركوس گونسالۆەش بولىپ جاتقان وقيعانىڭ رونالدۋعا قاتىسى جوق ەكەنىن راستادى. باقىتىمىزعا وراي، فۋتبولشىنىڭ جانكۇيەرلەرى ءراسىمنىڭ وتۋىنە كەدەرگى كەلتىرمەدى.