قوستاناي وبلىسىندا رۋدنىي قالاسىنىڭ تۇرعىنىنا قاتىستى ۇكىم شىعارىلدى. ول بيىلعى اقپان ايىندا سوت ورىنداۋشىسىنا پىشاقپەن شابۋىل جاساعان. وقيعا ايەل جۇمىستان قايتىپ كەلە جاتقاندا بولعان. اليمەنت تولەۋدەن قاساقانا جالتارعان ەر ادام ونىڭ موينى مەن بەتىنە ءتورت رەت پىشاق سۇققان، الايدا ايەل قارسىلىق كورسەتىپ، كومەككە ۇندەپ ۇلگەرگەن. القابيلەر سوتى ەر ادامدى سوت ورىنداۋشىسىنىڭ ومىرىنە قاستاندىق جاسادى دەپ كىنالى دەپ تانىپ، ونى 15 جىلعا باس بوستاندىعىنان ايىردى، دەپ حابارلايدى infohub.kz.
ەسكە سالايىق، بيىلعى اقپاندا رۋدنىي قالاسىنىڭ سوت ورىنداۋشىسى جانسۇلۋ حامزينا ءوز كولىگىندە اليمەنت بويىنشا قارىزدار ازاماتتىڭ شابۋىلىنا ۇشىراعانىن مالىمدەگەن بولاتىن. سول كەزدە كۇدىكتى ۇستالىپ، قىلمىستىق ءىس قوزعالعان ەدى. بۇگىن قوستاناي وبلىستىق سوتىنىڭ ءباسپاسوز قىزمەتى ۇكىم شىعارىلعانىن حابارلادى.
سوت تەرگەۋى بارىسىندا انىقتالعانداي، ايىپتالۋشى ك. 2012 جىلدان باستاپ كامەلەتكە تولماعان بالالارىنا اليمەنت تولەۋدەن قاساقانا جالتارىپ، ناتيجەسىندە اتقارۋشىلىق ءىس جۇرگىزۋ بويىنشا 9 ميلليون تەڭگەدەن استام قارىز جيناعان. سوت ورىنداۋشىسى حامزينا سوت شەشىمىن ماجبۇرلەپ ورىنداۋ ءۇشىن زاڭدا كوزدەلگەن بارلىق شارالاردى قولدانعان.
2026 جىلدىڭ اقپان ايىندا ك. سوت ورىنداۋشىسىنىڭ قىزمەتىنە كەدەرگى كەلتىرگىسى كەلىپ، ونىڭ جۇمىستان شىعۋىن ادەيى كۇتىپ تۇرعان. سودان كەيىن ول ايەلدى ءولتىرۋ ماقساتىمەن ونىڭ كولىگىنىڭ ىشىندە شابۋىل جاساپ، موينى مەن بەتىنە ادەيى ءتورت رەت پىشاق سۇققان. قىلمىستىق ارەكەتتەر سالدارىنان پىشاقتىڭ ءجۇزى سىنىپ قالعان، ال جابىرلەنۋشى بەلسەندى قارسىلىق كورسەتىپ، كولىكتەن جۇگىرىپ شىعىپ، كومەككە ايعايلاعان.
شابۋىل جاساۋشى وقيعا ورنىنان اسىعىس قاشىپ كەتىپ، ءىزىن جاسىرۋعا تىرىسقان. حامزينانىڭ بەتى مەن سول جاق بىلەگىنە پىشاق جاراقاتتارى تۇسكەن.
القابيلەر ايىپتالۋشىنى كىنالى دەپ تانىپ، وعان ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە وتەلەتىن 15 جىل باس بوستاندىعىنان ايىرۋ جازاسىن تاعايىندادى.