قازاقستاندىق تەننيسشى ەلەنا رىباكينا تورونتوداعى Canadian Open فينالىنداعى جەڭىلىستەن كەيىن جانكۇيەرلەرگە ۇندەۋ جاسادى، دەپ حابارلايدى infohub.kz.
شەشۋشى ماچتا الەمنىڭ ەكىنشى راكەتكاسى پولياك يگا شۆەنتەككە ەكى سەتتە — 2:6، 3:6 ەسەبىمەن ەسە جىبەردى. رىباكينا مۇنداي ناتيجەدەن كەيىن ءسوز تابۋ قيىن ەكەنىن مويىندادى.
«ءقازىر ماعان ءسوز تابۋ قيىن... مەن بار كۇشىمدى سالدىم، ءبىراق بۇل جەتكىلىكسىز بولدى. مەن يگانى جانە ونىڭ كومانداسىن تاماشا تۋرنيرىمەن قۇتتىقتاعىم كەلەدى. بارلىق جانكۇيەرلەرگە كەرەمەت اتموسفەرا ءۇشىن راحمەت. كەلەسى جولى وسىندا قايتىپ ورالۋعا ۇمىتتەنەمىن! سونداي-اق، وسى ءتۋرنيردى ۇيىمداستىرۋشىلاردىڭ بارلىعىنا العىس ايتقىم كەلەدى. ارينە، مەنىڭ كومانداما راحمەت — سىزدەرسىز، جىگىتتەر، فينالعا جەتۋ مۇمكىن بولماس ەدى! ءبىز جۇمىستى جالعاستىرىپ، العا جىلجي بەرەمىز»، — دەدى رىباكينا.
فينالعا دەيىن قازاقستاننىڭ ءبىرىنشى راكەتكاسى جارتىلاي فينالدا امەريكالىق كوري گاۋففتى جەڭىپ شىقتى. كەزدەسۋ ءۇش سەتتە 5:7، 6:2، 6:2 ەسەبىمەن قازاقستاندىق سپورتشىنىڭ پايداسىنا اياقتالدى.
شەشۋشى ماچتا رىباكينا پولياك يگا شۆەنتەكپەن كەزدەستى. ءباس WTA 1000 ءتۋرنيرىنىڭ تيتۋلى مەن 1000 رەيتينگتىك ۇپاي بولدى، الايدا قازاقستاندىق سپورتشى جۇلدەنى يەلەنە المادى.
فينالداعى جەڭىلىسكە قاراماستان، تورونتوداعى ونەر رىباكيناعا WTA رەيتينگىندەگى پوزيسياسىن نىعايتۋعا جانە الەمنىڭ ءبىرىنشى راكەتكاسى ارينا سوبولەنكودان ايىرماشىلىقتى قىسقارتۋعا مۇمكىندىك بەردى.
تۋرنير باستالار الدىندا رىباكينا بەلارۋس تەننيسشىسىنەن 494 ۇپايعا قالىپ قويعان ەدى. فينالعا شىققاننان كەيىن ايىرماشىلىق 354 ۇپايعا دەيىن قىسقاردى. ءقازىر رىباكينادا 8316 ۇپاي، سوبولەنكودا — 8670.
قازاقستاندىق سپورتشىعا قاشىقتىقتى قىسقارتۋعا سوبولەنكونىڭ Canadian Open-نان مەرزىمىنەن بۇرىن شىعىپ قالۋى دا كومەكتەستى. الەمنىڭ ءبىرىنشى راكەتكاسى 1/8 فينالدا WTA رەيتينگىندە 19-ورىندا تۇرعان رەسەيلىك ەكاتەرينا الەكساندروۆاعا ەسە جىبەردى.
رىباكينا، كەرىسىنشە، ءتۋرنيردىڭ شەشۋشى ماچىنا دەيىن جەتىپ، وندا الەمنىڭ سەگىزىنشى راكەتكاسى يگا شۆەنتەككە 2:6، 3:6 ەسەبىمەن ۇتىلدى.