قازاقستاندىق تەننيسشى ەلەنا رىباكينا (2ء-شى ءنومىر) قىزۋ ءۇش سەتتىك ماچتا جاپونيالىق ناومي وساكانى (13ء-شى ءنومىر) 4:6، 7:6 (7:5)، 6:4 ەسەبىمەن تىزە بۇكتىرىپ، كانادا اشىق چەمپيوناتىنىڭ جارتىلاي فينالىنا جولداما الدى، دەپ حابارلايدى infohub.kz.
ايتا كەتەرلىگى، بۇعان دەيىن 28 جاستاعى وساكا مەن 27 جاستاعى رىباكينا كورتتا بىر-بىرىمەن كەزدەسپەگەن ەدى. تورونتوداعى شيرەك فينال ولاردىڭ العاشقى بەتپە-بەت كەزدەسۋى بولدى.
العاشقى گەيمدە-اق جاپونيالىق برەيك جاساپ، سەت سوڭىنا دەيىن باسىمدىقتى ساقتاپ قالدى — 6:4. ەكىنشى پارتيادا وساكا قارسىلاسىنىڭ پوداچاسىن ەكى رەت الىپ، ءبىراق رىباكينا دا ءدال سولاي جاۋاپ بەردى، ال تاي-برەيكتە دالىرەك وينادى — 7:5.
شەشۋشى سەتتە ەلەنانىڭ پوداچاسى تولىق كۇشىنە ەنىپ، قارسىلاستىڭ رۋحىن سىندىرعانداي بولدى. جەتىنشى گەيمدە برەيك جاساعان قازاقستاندىق ماچتى جەڭىسپەن اياقتادى. قورىتىندى ەسەپ — 4:6، 7:6 (7:5)، 6:4. كەزدەسۋ 2 ساعات 33 مينۋتقا سوزىلدى. رىباكينا 15 ەيس جاسادى (وساكادا 3)، قوسارلانعان قاتەلىكتەر سانى 6-دان (قارسالاسىندا دا سونشا)، ال ۇتىلعان ۇپايلار بويىنشا جاپونيالىقتان باسىم ءتۇستى — 111:107.
جارتىلاي فينالدا رىباكينا الەمنىڭ ءتورتىنشى راكەتكاسى امەريكالىق كوري گاۋففپەن كەزدەسەدى. گاۋفف شۆەيساريالىق بەليندا بەنچيچتىڭ (14ء-شى ءنومىر) باس تارتۋىنا بايلانىستى جارتىلاي فينالعا كۇرەسسىز شىقتى.
كانادا اشىق چەمپيوناتى 1881 جىلدان بەرى وتكىزىلىپ كەلەدى، سول جىلى العاشقى ەرلەر ءتۋرنيرى وتكەن. ايەلدەر جارىسى 11 جىلدان كەيىن باستالدى.
جۇپ جىلدارى ايەلدەر ءتۋرنيرى تورونتودا، ەرلەر ءتۋرنيرى مونرەالدا وتەدى. 2011 جىلدان باستاپ US Open Series قۇرامىنداعى حارد كورتتاعى جارىستار ءبىر ۋاقىتتا وتكىزىلەدى.
تورونتوداعى قازىرگى WTA-1000 ءتۋرنيرىنىڭ رەسمي اتاۋى — National Bank Open Presented by Rogers. جۇلدە قورى 7،4 ميلليون دوللاردى قۇرايدى.
جىلدار بويى تۋرنير جەڭىمپازدارى اراسىندا امەريكالىقتار كريس ەۆەرت، مارتينا ناۆراتيلوۆا، دجەننيفەر كاپرياتي، مونيكا سەلەش، سەرەنا ۋيليامس، نەمىس شتەففي گراف، شۆەيساريالىق مارتينا حينگيس، بەلگيالىقتار جيۋستين ەنەن مەن كيم كلەيستەرس، فرانسيالىق امەلي مورەسمو جانە باسقا دا جۇلدىزدار بار.
قازىرگى چەمپيون ۆيكتوريا مبوكو جاراقاتىنا بايلانىستى وسى جىلعى ءۇي ءتۋرنيرىن وتكىزىپ جىبەرىپ وتىر. 2025 جىلعى جارتىلاي فينالدا كانادالىق رىباكينانى 1:6، 7:5، 7:6 (7:4) ەسەبىمەن جەڭگەن، ال فينالدا وساكانى 2:6، 6:4، 6:1 ەسەبىمەن تىزە بۇكتىرگەن.