قازاقستاندىق تەننيسشى ەلەنا رىباكينا تورونتوداعى بەدەلدى ءتۋرنيردىڭ فينالىنداعى جەڭىلىسىنە تۇسىنىكتەمە بەردى، دەپ حابارلايدى infohub.kz.
ەسكە سالايىق، قازاقستاننىڭ ءبىرىنشى راكەتكاسى ايەلدەر جەكە سىنىندا تورونتوداعى WTA 1000 حارد تۋرنيرىندە تيتۋلعا ءبىر قادام جەتپەي قالدى. الەمدىك رەيتينگتە ەكىنشى ورىندا تۇرعان سپورتشى فينالدا الەمنىڭ سەگىزىنشى راكەتكاسى پولياك يگا شۆەنتەكپەن كەزدەستى. ماچ ەكى سەتكە عانا سوزىلىپ، رىباكينا 2:6، 3:6 ەسەبىمەن جەڭىلىپ قالدى. تەننيسشىلەر كورتتا 1 ساعات 15 مينۋت وتكىزدى.
فينالدان كەيىن ەلەنا شۆەنتەك پەن ءوز كومانداسىنا العىس ءبىلدىردى.
«راقمەت، جىگىتتەر. ءسوز تابۋ قيىن. بۇگىن كۇش جەتپەدى. بار كۇشىمدى سالدىم، ءبىراق بۇل جەتكىلىكسىز بولدى. ارينە، يگانى جانە ونىڭ كومانداسىن تاماشا تۋرنيرىمەن قۇتتىقتايمىن. ارينە، سىزدەرگە كەرەمەت اتموسفەرا ءۇشىن ۇلكەن راقمەت. تۋرنير تاماشا ءوتتى. جاقىن ارادا وسىندا قايتا ورالامىن دەپ ۇمىتتەنەمىن»، — دەدى رىباكينا ماچتان كەيىنگى سۇحباتىندا.
ايتا كەتەيىك، شۆەنتەك پەن رىباكينا اراسىنداعى جەكە كەزدەسۋلەردەگى ەسەپ پولياك تەننيسشىسىنىڭ پايداسىنا 7-6 بولدى.