قازاقستاندىق تەننيسشى ەلەنا رىباكينا (2ء-شى ءنومىر) اقش اشىق چەمپيوناتى-2026 ەكىنشى اينالىمىندا يسپانيالىق دجەسسيكا بۋزاس مانەيرونى (الەمدىك رەيتينگتە 105ء-شى) 6:2، 6:4 ەسەبىمەن جەڭىپ، سەنىمدى تۇردە ءۇشىنشى اينالىمعا ءوتتى. ماچ 1 ساعات 8 مينۋتقا سوزىلدى، دەپ حابارلايدى infohub.kz.
ءبىرىنشى پارتيادا رىباكينا ءمىنسىز وينادى: قارسىلاسىنىڭ پوداچاسىن ەكى رەت الدى جانە سەتتى 6:2 ەسەبىمەن اياقتادى. ەكىنشى سەتتە يسپانيالىق ويىنشى قاتتى قارسىلىق كورسەتتى، الايدا قازاقستاندىق تەننيسشىگە ءبىر برەيك جەتكىلىكتى بولدى – 6:4.
رىباكينانىڭ تابىسىنىڭ باستى فاكتورى ءبىرىنشى پوداچا بولدى: ول 65% جاعدايدا ءبىرىنشى دوپپەن بەردى جانە وسىنداي 37 روزىگرىشتىڭ 30-ىن (81%) ۇتىپ الدى. ماچ بارىسىندا ەلەنا جەتى ەيس جاسادى، ءتورت قوسارلانعان قاتەلىك جىبەردى.
رىباكينا التى برەيك-پوينتتىڭ تورتەۋىن پايدالاندى، ال بۋزاس مانەيرو قارسىلاسىنىڭ پوداچاسىن الۋدىڭ ەكى مۇمكىندىگىنىڭ ءبىرىن عانا ىسكە اسىردى. قازاقستاندىق تەننيسشى بەلسەندى ۇتىس ويىندارى بويىنشا يسپانيالىقتان ايتارلىقتاي باسىم بولدى – 22-گە قارسى 13.
سونىمەن قاتار رىباكينا 15 ەرىكسىز قاتەلىك جىبەردى، ال قارسىلاسى – 12. ۇتىس ويىندارىنىڭ جالپى اراقاتىناسى ءبىزدىڭ تەننيسشىنىڭ پايداسىنا 63:46 بولدى.
ءۇشىنشى اينالىمدا رىباكينا ۋكراينالىق يۋليا ستارودۋبسەۆامەن (الەمدىك رەيتينگتە 58ء-شى) كەزدەسەدى.
وتكەن ءتۇنى قازاقستاننىڭ تاعى ءبىر وكىلى يۋليا پۋتينسەۆا ەكىنشى اينالىم ماچىندا 2024 جىلعى وليمپيادا چەمپيونى قىتايلىق چجەن سينۆەنگە ءۇش سەتتە ەسە جىبەردى.
ەرلەر جارىسىندا الەكساندر بۋبليك ەكىنشى اينالىمدا فرانسۋز ادريان ماننارينونى جەڭىپ، كۇرەستى جالعاستىرۋدا. الەكساندر شەۆچەنكو بەس سەتتە دينو پريجميچتەن جەڭىلىپ، جارىستى اياقتادى.
اقش اشىق چەمپيوناتى – حاردتا وتەتىن جىل سايىنعى «ۇلكەن دۋلىعا» ءتۋرنيرى، كۇنتىزبەلىك جىلداعى ءتورت مەيدجوردىڭ سوڭعىسى. العاش رەت 1881 جىلى تامىزدا وتكەن US Open، ارالاس جۇپتار ءتۋرنيرىنىڭ كەيىنگە شەگەرىلۋىنە بايلانىستى قاتارىنان ەكىنشى جىل ءبىر اپتا بۇرىن باستالادى. جالپى جۇلدە قورى – $108 ملن – مەيدجورلار ءۇشىن رەكوردتىق. 1978 جىلدان باستاپ ماچتار نيۋ-يوركتەگى بيللي دجين كينگ اتىنداعى ۇلتتىق تەننيس ورتالىعىندا وتەدى.
ەرلەر اراسىنداعى قازىرگى چەمپيون – يسپانيالىق كارلوس الكاراس (3)، ول وتكەن جىلعى فينالدا ياننيك سيننەردى 6:2، 3:6، 6:1، 6:4 ەسەبىمەن جەڭگەن بولاتىن. ايتپاقشى، الەمدىك رەيتينگتىڭ ءبىرىنشى ءنومىرى يتاليالىق تەننيسشى تىزە جاراقاتىنا بايلانىستى US Open-2026-دان باس تارتتى. ايەلدەر اراسىندا 2025 جىلعى جەڭىمپاز بەلارۋس ارينا سوبولەنكو بولدى، ول شەشۋشى ماچتا امەريكالىق اماندا انيسيموۆانى 6:3، 7:6 (7:3) ەسەبىمەن ۇتتى.