گرۋزيانىڭ بۇرىنعى پرەزيدەنتى ميحايل سااكاشۆيلي ءوزىنىڭ قاماۋدا ۇستاۋ جاعدايلارىن ادامگەرشىلىككە جاتپايدى دەپ سانايدى، دەپ حابارلايدى infohub.kz سايتى.
ساياساتكەر بۇل مالىمدەمەنى Facebook الەۋمەتتىك جەلىسىندەگى پاراقشاسىندا جاسادى. ونىڭ ايتۋىنشا، ول جەلدەتىلمەيتىن، قاراڭعى، انتيسانيتاريالىق جاعدايداعى كىشكەنتاي كامەرادا وتىر. سااكاشۆيلي سونىمەن قاتار باسقا دا ساياسي تۇتقىنداردىڭ وسىنداي جاعدايدا ەكەنىن اتاپ ءوتتى.
گرۋزيانىڭ ەكس-پرەزيدەنتى جازۋشى ميگەل دە سەرۆانتەسپەن سالىستىردى. «1 قازاندا تۇتقىندالعانىما بەس جىل تولادى — سەرۆانتەستىڭ تۇتقىندا وتكىزگەن ۋاقىتىمەن بىردەي. حالىقارالىق نورمالار بويىنشا، جالعىز كامەرادا ۇزاق ۋاقىت ۇستاۋ ازاپتاۋ مەن ادامگەرشىلىككە جاتپايتىن قارىم-قاتىناسقا تەڭەستىرىلەدى»، — دەدى ول.
ەسكە سالايىق، ميحايل سااكاشۆيلي 2021 جىلدىڭ قازان ايىندا ۋكراينادان ورالعاننان كەيىن گرۋزيادا ۇستالعان بولاتىن. سودان بەرى ول بىرنەشە رەت اشتىق جاريالاپ، كەيىن توقتاتتى. ەكس-پرەزيدەنتكە قاتىستى بەس قىلمىستىق ءىس قوزعالىپ، ولار بويىنشا ۇكىمدەر شىعارىلدى. 2025 جىلدىڭ ناۋرىز ايىندا ول «پيدجاكتار ءىسى» دەپ بەلگىلى مەملەكەتتىك قاراجاتتى جىمقىرۋ ءىسى بويىنشا توعىز جىلعا باس بوستاندىعىنان ايىرىلدى. ءبىر اپتادان كەيىن سوت وعان شەكارانى زاڭسىز كەسىپ وتكەنى ءۇشىن تاعى 4،5 جىل تاعايىندادى. سونىمەن قاتار، سااكاشۆيلي ەۋروپالىق ادام قۇقىقتارى سوتىندا ءىستى ۇتىلدى.
ايتا كەتۋ كەرەك، سااكاشۆيلي تۇرمەدە وتىرعان كەزىندە ءۇش جىل اۋرۋحانادا وتكىزدى.