فرانسيانىڭ يسسۋار قالاسىنداعى زاماناۋي ونەر ورتالىعىنان سالۆادور دالي جاساعان «اۋليە يوانن اپوكاليپسيسىنىڭ» قولا مۇقاباسى ۇرلاندى. مۇقابانىڭ سالماعى شامامەن 150 كگ، پەرگامەنت بەتتەرىمەن قوسقاندا كىتاپتىڭ جالپى سالماعى 210 كگ-عا جەتەدى. ۇرلىق فاكتىسىن كلەرمون-فەرران پروكۋراتۋراسى راستادى، دەپ حابارلايدى infohub.kz سايتى.
تۋىندى 4 قازاننان 5 قازانعا قاراعان ءتۇنى جوعالىپ كەتكەن. قولا مۇقابا التىنمەن، اسىل تاستارمەن جانە تەڭىز قابىرشاقتارىمەن بەزەندىرىلگەن.
كىتاپ 1958–1961 جىلدارى فرانسۋز باسپاگەرى جوزەف فورەنىڭ باستاماسىمەن جاسالعان. ول الەمدە جالعىز دانا بولىپ سانالادى. تۋىندى ۇستىندە جەتى سۋرەتشى مەن جەتى جازۋشى جۇمىس ىستەگەن، ولاردىڭ قاتارىندا سالۆادور دالي، لەونار فۋجيتا، بەرنار بيۋففە، جان كوكتو جانە ەميل چوران بار.
ءماتىن 150 پەرگامەنت بەتىنە قولمەن جازىلعان. بۇرىن بۇل باسىلىم الەمدەگى ەڭ اۋىر جانە ەڭ قىمبات كىتاپ سانالعان.
حالىقارالىق كورمەلەردەن كەيىن تۋىندى شۆەيساريادا ساقتالعان، كەيىن جاپون يەلەرىنە وتكەن. كەيىنىرەك ونى كوللەكسيونەر ءارى رەستاۆراتور كريستيان كارۋسوس ساتىپ العان. مۇقابا مەن پەرگامەنت بەتتەرىنىڭ ءبىر بولىگى ونىڭ يسسۋارداعى ونەر ورتالىعىندا قويىلعان.
پروكۋراتۋرا ۇرلانعان تۋىندىنى «ەرەكشە جانە بىرەگەي» دەپ اتادى. تەرگەۋ جاندارمەرياعا تاپسىرىلدى. ۇرلىقتىڭ ءمان-جايى ازىرگە جاريالانباي وتىر.