كەيبىر قازاقستاندىقتار بىرنەشە جۇمىس بەرۋشىدە جۇمىس ىستەپ، سالىق شەگەرىمدەرىنىڭ جەڭىلدەتىلۋىنىڭ ارقاسىندا جالاقىسىن كوبەيتە الادى. جىلىنا 5 مىڭ اەك-كە دەيىنگى (21،6 ملن تەڭگە) الەۋمەتتىك سالىق شەگەرىمىن ەندى بىرنەشە جۇمىس بەرۋشىدە ءبىر ۋاقىتتا قولدانۋعا بولادى، دەپ حابارلايدى infohub.kz سايتى.
ماڭعىستاۋ وبلىسى مەملەكەتتىك كىرىستەر دەپارتامەنتىندە تۇسىندىرگەندەي، جىلىنا 5 مىڭ اەك-كە دەيىنگى (21،6 ملن تەڭگە) شەگەرىمدى ءبىرىنشى جانە ەكىنشى توپتاعى مۇگەدەكتىگى بار ادامدار قولدانا الادى. ءۇشىنشى توپتاعى مۇگەدەكتىگى بار، مۇگەدەك بالاسى نەمەسە مۇگەدەك اتا-اناسىنىڭ ءبىرى بار قازاقستاندىقتار جىلىنا 882 اەك-كە دەيىنگى (4،4 ملن تەڭگە) شەگەرىمگە سەنە الادى.
مكد-دا بارلىق قازاقستاندىقتارعا بازالىق سالىق شەگەرىمى (ايىنا 30 اەك، جىلىنا 360 اەك-كە دەيىن) تيەسىلى ەكەنىن اتاپ ءوتتى. الايدا ونى تەك ءبىر سالىق اگەنتىندە، ياعني جۇمىس بەرۋشىدە قولدانۋعا بولادى. الەۋمەتتىك سالىق شەگەرىمى ءۇشىن سالىق كودەكسىندە مۇنداي شەكتەۋلەر جوق.
بۇل ماسەلە سالىق كودەكسىن ەنگىزۋ جونىندەگى جوبالىق كەڭسەنىڭ تالقىلاۋىنا شىعارىلدى. 2026 جىلعى 8 شىلدەدە بەلگىلەنگەن ليميت اياسىندا الەۋمەتتىك سالىق شەگەرىمىن بىرنەشە سالىق اگەنتىندە، ياعني جۇمىس بەرۋشىدە ءبىر ۋاقىتتا قولدانۋ مۇمكىندىگىن كوزدەيتىن ءتاسىل ماقۇلداندى. ول ءۇشىن جەكە تۇلعانىڭ ءوتىنىشى قاجەت.
سالىق شەگەرىمى – بۇل تابىس سالىعى ەسەپتەلەتىن كىرىس سوماسىن ازايتۋ ءتاسىلى. ناتيجەسىندە ادام جالاقىدان جەكە تابىس سالىعىن (جتس) از تولەيدى جانە سايكەسىنشە «قولعا» كوبىرەك جالاقى الادى.
مىسالى، جالاقىسى 500 مىڭ تەڭگە بولاتىن ادامنىڭ قوسىمشا سالىق شەگەرىمى 100 مىڭ تەڭگە بولسا، سالىق 500 مىڭنان ەمەس، 400 مىڭ تەڭگەدەن ەسەپتەلەدى. وسىعان بايلانىستى ۇستالاتىن جتس سوماسى ازايادى.
بۇعان دەيىن «اتامەكەن» كاسىپكەرلەر پالاتاسىنىڭ وكىلدەرى جەكە تۇلعالار ءۇشىن پايدالانىلماعان سالىق شەگەرىمىن كەلەسى ايعا اۋىستىرۋدى قايتارۋدى ۇسىنعانى حابارلانعان بولاتىن.