بۇگىن كەشكە سامارقاندتا 46-دۇنيەجۇزىلىك شاحمات وليمپياداسى سالتاناتتى تۇردە اشىلادى. وعان 398 كوماندا، 1974 شاحماتشى جانە 240 گروسسمەيستەر قاتىسادى، دەپ حابارلايدى infohub.kz سايتى.
تۋرنيرگە قازاقستان قۇرامالارى دا قاتىسادى. ايەلدەر كومانداسى 2024 جىلى بۋداپەشتتە وتكەن وتكەن وليمپيادانىڭ ۆيسە-چەمپيونى رەتىندە جارىستى باستايدى.
ايەلدەر ءتۋرنيرىنىڭ فاۆوريتتەرى – وزبەكستانعا نەگىزگى قۇرامىمەن كەلگەن ءۇندىستاننىڭ قازىرگى چەمپيوندارى. باستى باسەكەلەستەر ستارتتىق نومىرلەرى بويىنشا: گرۋزيا، جۇڭگو، قازاقستان جانە اقش. رەسەيدىڭ ايەلدەر جانە ەرلەر قۇرامالارى سامارقاندتاعى تۋرنيرگە جىبەرىلمەدى.
ءبىزدىڭ كوماندا ءۇشىن ءبىرىنشى تاقتادا تاماشا ماۋسىم وتكىزىپ جاتقان 22 جاستاعى گروسسمەيستەر بيبيسارا اساۋباەۆا وينايدى. وتاندىق ايەلدەر شاحماتىنىڭ كوشباسشىسى Norway Chess بەدەلدى تۋرنيرىندە جەڭىسكە جەتىپ، Cairns Cup-تا ءۇشىنشى ورىن الدى. سونداي-اق الەمدىك شاحمات ءتاجى ءۇشىن پرەتەندەنتتەر تۋرنيرىندە ەكىنشى ورىنعا تۇراقتادى.
208 كوماندانىڭ ىشىنەن 34ء-شى سەپتى العان قازاقستاننىڭ ەرلەر قۇراماسىنىڭ ءبىرىنشى ءنومىرى – 26 جاستاعى گروسسمەيستەر دەنيس ماحنيەۆ.
اشىق (ەرلەر) تۋرنيرىندە ءبىرىنشى ستارتتىق ءنومىردى اقش قۇراماسى يەلەندى. ەكىنشى – قازىرگى شاحمات كورولى گۋكەش دوممارادجۋ باستاعان 2024 جىلعى چەمپيون ۇندىستەردە، ءۇشىنشى – جاۆوحير سينداروۆ باستاعان وزبەكستاندا. ول – شاحمات تاجىنە ۇمىتكەر ءارى ءبىزدىڭ اساۋباەۆانىڭ جىگىتى. ايتپاقشى، دوممارادجۋ – سينداروۆ اراسىنداعى الەم چەمپيونى اتاعى ءۇشىن ماچ جەنەۆادا 22 قاراشا مەن 13 جەلتوقسان ارالىعىندا وتەدى.
دۇنيەجۇزىلىك شاحمات وليمپياداسى شۆەيسار جۇيەسىمەن 11 تۋردا وتەدى. ءار كوماندا قۇرامىندا 4 ويىنشى جانە 1 قوسالقى بار. ۋاقىت باقىلاۋى كلاسسيكالىق: العاشقى 40 جۇرىسكە 90 مينۋت قوسىپ، 30 مينۋت. ءار جۇرىستەن كەيىن، بىرىنشىدەن باستاپ، 30 سەكۋند قوسىلادى.
ماچتا جەڭىسكە جەتكەن قۇراما ەكى كوماندالىق ۇپاي الادى، تەڭ ويىن ءۇشىن – ءبىر ۇپاي. تەڭدىك بولعان جاعدايدا قوسىمشا كورسەتكىشتەر جۇيەسى قولدانىلادى: بەرگەر كوەففيسيەنتى (قارسىلاستار جيناعان ۇپاي سانى)، سونداي-اق كوماندا مۇشەلەرىنىڭ جەكە ۇپايلارىنىڭ قوسىندىسى.
ەرلەر ءتۋرنيرىنىڭ جەڭىمپازدارىنا لورد فرەدەريك گۋستاۆۋس گاميلتون-راسسەل كۋبوگى، ايەلدەر ءتۋرنيرىنىڭ جەڭىمپازدارىنا ۆەرا مەنچيك كۋبوگى تابىس ەتىلەدى. ەكى كوماندانىڭ دا ورنىنىڭ ەڭ از قوسىندىسى بويىنشا ۇزدىك شىققان ەل نونا گاپرينداشۆيلي كۋبوگىمەن ماراپاتتالادى.
2026 جىلعى دۇنيەجۇزىلىك شاحمات وليمپياداسى كەزىندە فيدە كونگرەسى وتەدى، ونىڭ باس اسسامبلەياسىندا 26 قىركۇيەكتە حالىقارالىق شاحمات فەدەراسياسىنىڭ جاڭا پرەزيدەنتى سايلانادى. ۇمىتكەرلەر ۇشەۋ: نەمىس يان-حەنريك بيۋتتنەر، رەسەيلىك ۆاديم روزەنشتەين جانە قازاقستاننان تيمۋر تۋرلوۆ.