قازاقستان پرەزيدەنتى قاسىم-جومارت توقايەۆ «سامۇرىق-قازىنا» اق باسقارما ءتوراعاسى نۇرلان جاقىپوۆتى قابىلدادى، دەپ حابارلايدى infohub.kz.
كەزدەسۋ بارىسىندا مەملەكەت باسشىسى «سامۇرىق-قازىنا» قورىنىڭ قىزمەتى، نەگىزگى وندىرىستىك جانە قارجىلىق كورسەتكىشتەردىڭ ورىندالۋى، سونداي-اق ءىرى ينفراقۇرىلىمدىق جوبالاردىڭ ىسكە اسىرىلۋى تۋرالى ەسەپتى تىڭدادى.
قور باسقارما ءتوراعاسى نۇرلان جاقىپوۆ 2026 جىلى «سامۇرىق-قازىنا» 3،2 ترلن تەڭگەگە ينۆەستيسيالىق جوبالاردى اياقتاۋدى جوسپارلاپ وتىرعانىن مالىمدەدى. ولاردىڭ قاتارىندا — مويىنتى — قىزىلجار جانە داربازا — ماقتاارال تەمىرجول جەلىلەرىنىڭ قۇرىلىسى، التىنكول — جەتىگەن جانە بەينەۋ — ماڭعىستاۋ ۋچاسكەلەرىن جاڭعىرتۋ، قاشاعان كەن ورنىندا گاز وڭدەۋ زاۋىتىن سالۋ، الماتى جەو-2 جاڭعىرتۋ، تۇركىستان وبلىسىندا بۋ-گاز قوندىرعىسىن جانە گيبريدتى ەلەكتر ستانسياسىن سالۋ. سونىمەن قاتار، استانادا دەرەكتەردى وڭدەۋ ورتالىعىنىڭ قۇرىلىسى جانە كاسپي تەڭىزىنىڭ تۇبىمەن تالشىقتى-وپتيكالىق بايلانىس جەلىسىن تارتۋ اياقتالۋدا.
نۇرلان جاقىپوۆ قوردىڭ ينۆەستيسيالىق پورتفەلى تۋرالى دا اقپارات ۇسىندى. «بۇل باعىتتا 2027–2029 جىلدارى ەنەرگەتيكا، مۇناي-گاز سالاسى، كولىك جانە سيفرلىق ينفراقۇرىلىم سالالارىندا 21 ترلن تەڭگەگە 38 جوبانى ىسكە اسىرۋ جوسپارلانۋدا. الەۋمەتتىك باعىتتىڭ باسىمدىقتارى رەتىندە مەديسينالىق جانە الەۋمەتتىك نىسانداردى سالۋ، مۇگەدەكتىگى بار بالالارعا ارنالعان 55 ورتالىق پەن 46 ينكليۋزيا كابينەتىن اشۋ، سونداي-اق سپورتتىق جانە ءبىلىم بەرۋ ينفراقۇرىلىمىن دامىتۋ قاراستىرىلۋدا»، — دەپ ناقتىلادى قور ءتوراعاسى.
كەزدەسۋ قورىتىندىسى بويىنشا پرەزيدەنت قور جۇمىسىنىڭ نەگىزگى باعىتتارى بويىنشا ءبىرقاتار تاپسىرمالار قويدى.