Samsung Electronics Central Eurasia (SECE) كورپوراسياسى مەن Kazakhmys Barlau كومپانياسى دالالىق وندىرىستىك پروسەستەردى سيفرلاندىرۋعا باعىتتالعان ىنتىماقتاستىق تۋرالى كەلىسىم جاسادى. تاراپتار Kazakhmys Barlau كومپانياسىنىڭ گەولوگيالىق بارلاۋ جۇمىستارىن اۆتوماتتاندىرۋداعى تاجىريبەسىن Samsung كورپوراتيۆتىك ءموبيلدى تەحنولوگيالارىمەن بىرىكتىرۋدى جوسپارلاپ وتىر. ماقسات – وندىرىستىك نىساندارداعى قىزمەتكەرلەردىڭ جۇمىسىن جەڭىلدەتۋ، قولمەن ورىندالاتىن وپەراسيالاردى ازايتۋ جانە دەرەكتەر الماسۋدى جىلدامداتۋ، دەپ حابارلايدى infohub.kz سايتى.
12 تامىزدا الماتىدا وتكەن كەزدەسۋدە SECE پرەزيدەنتى يوندجين پاك پەن Kazakhmys Barlau باس ديرەكتورى عالىم نۇرجانوۆ ءوزارا ءىس-قيمىلدىڭ نەگىزگى باعىتتارىن جانە Samsung كورپوراتيۆتىك ءموبيلدى شەشىمدەرىن پايدالانا وتىرىپ، پيلوتتىق جوبانى ىسكە قوسۋ پەرسپەكتيۆالارىن تالقىلادى.
جوبانىڭ ماڭىزدى قۇرامداس بولىگى Kazakhmys Barlau ازىرلەگەن ASPANS اقپاراتتىق جۇيەسى بولادى. ول وندىرىستىك دەرەكتەردى جيناۋ مەن ساقتاۋدى، ەسەپتىلىكتى اۆتوماتتاندىرۋدى جانە اناليتيكانى بىرىكتىرەدى. جۇيە بۇرعىلاۋ پروسەستەرىندە قولدانىلىپ، ەلەكتروندىق بۇرعىلاۋ ەسەپتىلىگىن اۆتوماتتى تۇردە قالىپتاستىرۋعا مۇمكىندىك بەرەدى، قولمەن ورىندالاتىن جۇمىس كولەمىن ازايتادى.
كەلەسى قادام – قىزمەتكەرلەرگە سيفرلىق قۇرالدارعا تىكەلەي «دالادا» قول جەتكىزۋدى قامتاماسىز ەتۋ. ول ءۇشىن ورتالىقتاندىرىلعان باسقارۋى (MDM) بار Samsung كومپانياسىنىڭ ارنايى كورپوراتيۆتىك ءموبيلدى قۇرىلعىلارىن پايدالانۋ قاراستىرىلۋدا. قىزمەتكەرلەر تاپسىرمالار الا الادى، ەلەكتروندىق نىساندار مەن چەك-پاراقتاردى تولتىرا الادى، ناتيجەلەردى جۇمىس ورنىندا تىركەي الادى. دەرەكتەر ASPANS جۇيەسىنە جىبەرىلىپ، ەسەپتىلىك، اناليتيكا جانە باسقارۋ شەشىمدەرىن قابىلداۋ ءۇشىن پايدالانىلادى.
مۇنداي ءتاسىل قاعاز قۇجاتتاردىڭ ءبىر بولىگىنەن جانە اقپاراتتى قايتا ەنگىزۋدەن بىرتىندەپ باس تارتۋعا مۇمكىندىك بەرەدى، ال كومپانيا قاجەتتى وندىرىستىك دەرەكتەردى تەزىرەك الا الادى. Samsung ءموبيلدى تەحنولوگيالارى مەن ASPANS مۇمكىندىكتەرىن بىرىكتىرۋ قىزمەتكەرلەردىڭ نىساندارداعى جۇمىسىن كورپوراتيۆتىك سيفرلىق جۇيەلەرمەن بايلانىستىرۋدى قامتاماسىز ەتەدى. بولاشاقتا جينالعان دەرەكتەر تەرەڭدەتىلگەن اناليتيكا جانە جاساندى ينتەللەكت تەحنولوگيالارىن قولدانۋ ءۇشىن پايدالانىلۋى مۇمكىن.
كومپانيا باسشىلارى ىنتىماقتاستىق تۋرالى مەموراندۋمعا قول قويىپ، جوبانىڭ الدىن الا جول كارتاسىن كەلىستى. Kazakhmys Barlau وكىلدەرى سونداي-اق Samsung دەمونستراسيالىق زالىنا بارىپ، ءارتۇرلى بيزنەس-مىندەتتەرگە ارنالعان كورپوراتيۆتىك شەشىمدەرمەن تانىستى.
سونىمەن قاتار، Samsung Kazakhmys Barlau قىزمەتكەرلەرىنە Samsung كورپوراتيۆتىك ونلاين-پلاتفورماسىنا قول جەتكىزۋدى قامتاماسىز ەتۋ مۇمكىندىگىن پىسىقتايدى، وندا ولار تەكسەرۋدەن وتكەننەن كەيىن كومپانيا ونىمدەرىن ارنايى شارتتارمەن ساتىپ الا الادى.