قازاقستاننىڭ قۇرىلىس كومپانيالارى الداعى بەس جىلدا جاساندى ينتەللەكت پەن سيفرلىق تەحنولوگيالاردى ەنگىزبەسە، باسەكەگە توتەپ بەرە الماي قالۋى مۇمكىن. بۇل تۋرالى «قازاقستان قۇرىلىسشىلار وداعى» فيليالىنىڭ الماتى قالاسى بويىنشا ديرەكتورى تيمۋر نۇرتايەۆ مالىمدەدى، دەپ حابارلايدى infohub.kz سايتى.
ونىڭ باعالاۋىنشا، ەلىمىزدەگى قۇرىلىس سالاسىنىڭ سيفرلاندىرۋ دەڭگەيى وتە تومەن.
«شىنىمدى ايتسام، مەنىڭ جەكە پىكىرىم: قازاقستانداعى قۇرىلىس سالاسىنىڭ سيفرلاندىرۋى وتە تومەن دەڭگەيدە. بۇل باعىتتا كوش باستاپ جۇرگەن ءبىرقاتار كومپانيالار بار، ءبىراق جالپى العاندا، بۇل — ءتىپتى اپاتتى جاعداي»، – دەدى نۇرتايەۆ.
ول پروبلەمالاردىڭ ءبىرى رەتىندە جوبالاۋ كەزىندە BIM-تەحنولوگيالاردىڭ (عيماراتتىڭ نەمەسە جولدىڭ بارلىق ولشەمدەرى، ماتەريالدارى مەن جۇيەلەرى تۋرالى دەرەكتەردى قامتيتىن سيفرلىق 3D-مودەلىن جاساۋ پروسەسى) جەتكىلىكسىز قولدانىلۋىن اتادى. قۇرىلىسشىلار وداعى وكىلىنىڭ ايتۋىنشا، كوپتەگەن جوبالاۋ ۇيىمدارى مۇنداي شەشىمدەردى ءالى كۇنگە دەيىن قولدانبايدى، سەبەبى بۇل زاڭنامادا دا، تاپسىرىس بەرۋشى تاراپىنان دا تالاپ ەتىلمەيدى.
سالدارى قۇرىلىس كەزىندە تىكەلەي بايقالادى. مىسالى، ينجەنەرلىك كوممۋنيكاسيالار بىر-بىرىمەن قيىلىسىپ، كەيبىر جۇمىستاردى قايتا ىستەۋگە تۋرا كەلەدى. بۇل قۇرىلىس سالۋشىنىڭ شىعىنىن ارتتىرىپ، سوڭىندا قۇرىلىس قۇنىنا اسەر ەتەدى.
نۇرتايەۆ جوبالاۋ كەزەڭىندە سيفرلىق تەحنولوگيالاردى بەلسەندىرەك قولدانۋ مۇنداي پروبلەمالاردى الدىن الا انىقتاۋعا جانە قايتا جۇمىستاردىڭ سانىن ازايتۋعا مۇمكىندىك بەرەتىنىن ايتادى.
سيفرلاندىرۋدىڭ تاعى ءبىر باعىتى رەتىندە نۇرتايەۆ مەملەكەتتىك ساراپتامادان ءوتۋدى اتادى. ونىڭ ايتۋىنشا، ءقازىر جوبانىڭ ساراپتاما مەرزىمى 45 جۇمىس كۇنىن نەمەسە شامامەن 60 كۇنتىزبەلىك كۇندى قۇرايدى. ءبىراق جوبا ءبىرىنشى رەتتەن وتە الماۋى مۇمكىن، بۇل مەرزىمدى ودان ءارى ۇزارتادى.
ساراپشى مىسال رەتىندە مەملەكەتتىك ساراپتاما سالاسىندا جاساندى ينتەللەكتتى قولداناتىن Armeta كومپانياسىن كەلتىردى. ونىڭ ايتۋىنشا، بۇل كومپانيانىڭ تەحنولوگيالارى پروسەستى ءۇش-تورت كۇنگە، ال كەيبىر جاعدايلاردا بىرنەشە ساعاتقا دەيىن قىسقارتۋعا مۇمكىندىك بەرەدى.
نۇرتاەۆتىڭ پىكىرىنشە، جوبالاۋ، ساراپتاما جانە قۇرىلىس پروسەستەرىن سيفرلاندىرۋ نىسانداردىڭ قۇنىن تومەندەتە الادى.
سونىمەن قاتار، قازاقستاننىڭ قۇرىلىس سالاسى روبوتتاندىرۋ مەن درونداردى قولدانۋدى بەلسەندىرەك قاراستىرۋى كەرەك. مامان بۇل تەحنولوگيالاردىڭ، اتاپ ايتقاندا، قىتايدا قولدانىلىپ جاتقانىن اتاپ ءوتتى.
قۇرىلىسشىلار وداعىنىڭ وكىلى جاڭا تەحنولوگيالاردى ەنگىزۋ بولاشاقتا شىعىنداردى ازايتۋدىڭ عانا ەمەس، كومپانيالاردىڭ باسەكەگە قابىلەتتىلىگىنىڭ ماسەلەسىنە اينالادى دەپ سانايدى.
«الداعى بەس جىلدا جاساندى ينتەللەكت پەن سيفرلاندىرۋدى ەنگىزبەگەن كومپانيالار نارىقتا شىدامايدى، ويتكەنى ولاردى قولداناتىن جانە ەنگىزەتىندەردىڭ قۇرىلىس قۇنى تومەن بولادى»، – دەدى نۇرتايەۆ.