اتىراۋ وبلىسىندا ءبىر وتباسىنىڭ ءتورت مۇشەسىن ءولتىردى دەپ ايىپتالعان سۇلتان سارسەماليەۆتىڭ ءىسى بويىنشا تاراپتاردىڭ پىكىرتالاسى باستالدى. مەملەكەتتىك ايىپتاۋشى سوتتان ونى كىنالى دەپ تانىپ، ءومىر بويى باس بوستاندىعىنان ايىرۋ جازاسىن تاعايىنداۋدى سۇرادى... دەپ حابارلايدى infohub.kz سايتى.
اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى رەزونانستى قىلمىستىق ءىستى قاراۋدا. سارسەمالييەۆ ءوزىنىڭ بۇرىنعى ايەلى اقبايان مۇقانعاليەۆانىڭ اكەسىن، اناسىن، اعاسىن جانە قارىنداسىن ءولتىردى دەپ ايىپتالۋدا. بۇل قايعىلى وقيعا 2025 جىلدىڭ سوڭىندا جانگەلدين اۋىلىندا بولعان.
سوتتىق پىكىرتالاس بارىسىندا پروكۋرور ايىپتالۋشىنى قىلمىستىق كودەكستىڭ بىرنەشە بابى بويىنشا كىنالى دەپ تانۋدى جانە جازانى توتەنشە قاۋىپسىزدىك مەكەمەسىندە وتەۋدى سۇرادى.
«قىلمىستىق كودەكستىڭ 58-بابىنىڭ 4-بولىگى نەگىزىندە سارسەمالييەۆ سۇلتان ساميگوللا ۇلىنا تۇپكىلىكتى جازا رەتىندە ءومىر بويىنا باس بوستاندىعىنان ايىرۋ جازاسىن تاعايىنداۋدى سۇرايمىن»، — دەدى مەملەكەتتىك ايىپتاۋشى.
سارسەماليەۆكە ەكى جانە ودان دا كوپ ادامدى ءولتىرۋ، دارمەنسىز كۇيدەگى ادامدى ءولتىرۋ، اسا قاتىگەزدىكپەن جانە پايداكۇنەمدىك نيەتپەن ءولتىرۋ، سونداي-اق توناۋ نەمەسە بوپسالاۋمەن ۇشتاسقان قىلمىس جاساۋ ايىپتارى تاعىلدى.
سونىمەن قاتار، ول ءىرى كولەمدەگى ۇرلىق جانە الاياقتىق، مال ۇرلىعى، سونداي-اق قۇجاتتاردى زاڭسىز يەلەنۋ، جاسىرۋ، جويۋ نەمەسە ءبۇلدىرۋ باپتارى بويىنشا جاۋاپكەرشىلىككە تارتىلۋدا.
پروكۋرور سونداي-اق سوتتان ايىپتالۋشىدان زارداپ شەككەندەردىڭ پايداسىنا 30 ايلىق ەسەپتىك كورسەتكىش مولشەرىندە وتەماقى ءوندىرۋدى سۇرادى، بۇل 129 750 تەڭگەنى قۇرايدى. سونىمەن قاتار، 2 512 128 تەڭگە كولەمىندەگى پروسەسسۋالدىق شىعىنداردى وتەۋدى جانە بۇلتارتپاۋ شاراسى رەتىندەگى قاماۋدا ۇستاۋدى وزگەرىسسىز قالدىرۋدى سۇرادى.
مەملەكەتتىك ايىپتاۋشى سونداي-اق زارداپ شەككەن تاراپتىڭ ماتەريالدىق جانە مورالدىق زياندى وتەۋ تۋرالى ازاماتتىق تالاپتارىن قاناعاتتاندىرۋدى سۇرادى.
سۇلتان سارسەمالييەۆ ناۋرىز مۇقانعاليەۆتى قاساقانا ءولتىردى دەگەن ايىپتى مويىندامايتىنىن مالىمدەدى.
تاراپتاردىڭ پىكىرتالاسى اياقتالعاننان كەيىن ايىپتالۋشىعا سوڭعى ءسوز بەرىلەدى. ودان كەيىن سوت ۇكىم شىعارۋ ءۇشىن كەڭەسۋ بولمەسىنە كەتەدى.