«سوزاق فوسفات» كومپانياسى سەيتجانوۆتار وتباسى بيزنەسىنىڭ قۇرامىنا كىرەدى. ول سوزاق اۋدانىندا فوسفوريت كەنىن تەرەڭ وڭدەۋ زاۋىتىن سالۋعا 150 ملرد تەڭگە ينۆەستيسيالايدى، دەپ حابارلايدى infohub.kz سايتى تۇركىستان وبلىسى اكىمدىگىنە سىلتەمە جاساپ.
كاسىپورىندى 2028 جىلى ىسكە قوسۋ جوسپارلانعان. زاۋىت شامامەن مىڭ جۇمىس ورنىن اشادى دەپ كۇتىلۋدە. 10 جىل ىشىندە جوبانىڭ بيۋدجەتكە سالىق تولەمدەرى شامامەن 43،3 ملرد تەڭگەنى قۇرايدى.
كاسىپورىن تولىق وندىرىستىك سيكلدى قامتاماسىز ەتەدى – كەن ءوندىرۋ مەن بايىتۋدان باستاپ جوعارى قوسىلعان قۇنى بار حيميالىق ءونىم شىعارۋعا دەيىن. جوبالىق قۋاتقا شىققاننان كەيىن زاۋىت جىلىنا 2 ملن توننا فوسفات كەنىن بايىتا الادى.
حيميالىق ءونىمنىڭ جىلدىق ءوندىرىس كولەمى: كۇكىرت قىشقىلى – 1،6 ملن توننا، فوسفور قىشقىلى – 600 مىڭ توننا، دياممونيفوسفات (DAP) – 600 مىڭ توننا، مونواممونيفوسفات (MAP) – 600 مىڭ توننا، سينتەتيكالىق اممياك – 350 مىڭ توننا.
ءونىمدى ىشكى نارىققا جەتكىزۋ، سونداي-اق قىتايعا، ءۇندىستانعا جانە جاقىن شەت ەلدەرگە ەكسپورتتاۋ جوسپارلانۋدا.
جوبا يندۋستريالاندىرۋ كارتاسىنا ەنگىزىلگەن. كەن ورنىنداعى فوسفوريت قورى شامامەن 1 ملرد تونناعا باعالانادى، قۇرامىنداعى فوسفور 20-30%.
جوبانىڭ تەحنولوگيالىق بولىگىن قىتايلىق Sinopec Nanjing Engineering Co.، Ltd. كومپانياسى ازىرلەيدى، ونىمەن EPC-كەلىسىمشارت جاسالعان. ءقازىر ماماندار الاڭدى زەرتتەپ، كەن ۇلگىلەرىن الىپ، تەحنولوگيالىق شەشىمدەردى تەكسەرۋدە. تەحنيكالىق-ەكونوميكالىق نەگىزدەمەنى (تەن) ازىرلەۋدى بيىلعى قازان ايىندا اياقتاۋ جوسپارلانۋدا، ودان كەيىن جوبالاۋ، ينفراقۇرىلىم تارتۋ، تەمىر جول سالۋ جانە جابدىق ساتىپ الۋ باستالادى.
«ساۋتس-ويل» حولدينگىنىڭ پرەزيدەنتى سەرىكجان سەيتجانوۆتىڭ ايتۋىنشا، جاڭا كاسىپورىنعا جۇمىسقا 300 جاس ماماندى شەتەلگە وقۋعا جىبەرۋ جوسپارلانۋدا.
سەرىكجان سەيتجانوۆ وتباسىمەن بىرگە Forbes نۇسقاسى بويىنشا قازاقستاننىڭ 75 ەڭ باي بيزنەسمەنى رەيتينگىندە $402 ملن بايلىعىمەن 27-ورىندا تۇر.
سونداي-اق وتباسىنا «مۇنايقۇرىلىسسەرۆيس» قۇرىلىس كومپانياسى، Smart-Oil بۇرعىلاۋ كاسىپورنى، «ستاندارت سەمەنت»، Central Asia Mining Co جانە Talas Investment Company سيانيد زاۋىتى تيەسىلى. سەيتجانوۆتار سونداي-اق Rixos Khadisha Shymkent جانە Rixos Turkestan قوناق ۇيلەرىنە، Khanshaiym Plaza ساۋدا-ويىن-ساۋىق ورتالىعىنا يەلىك ەتەدى.
بۇعان دەيىن «كۋرسيۆ» الماتى وبلىسىندا 9،5 ملرد تەڭگەگە جاڭا زاۋىت ىسكە قوسىلعانىن جازعان.