سەمەيدە سوت بۇرىنعى ايەلىن اعاش بيتامەن ولتىرگەن ەر ادامعا ۇكىم شىعاردى. ايىپتالۋشى كىسى ولتىرۋدە كىنالى دەپ تانىلىپ، 12 جىلعا باس بوستاندىعىنان ايىرىلدى، دەپ حابارلايدى infohub.kz سايتى.
قايعىلى وقيعا ءساۋىر ايىندا بولدى. ماس كۇيىندەگى ەر ادام قىزعانىشتان بۇرىنعى ايەلىنە بالالارىمەن تۇراتىن ءۇيىنىڭ اۋلاسىندا شابۋىل جاسادى. ول ايەلگە بيتامەن 27 رەت سوققى جاساپ، ول سول جەردە قايتىس بولدى.
سوتتا قايتىس بولعان ايەلدىڭ تۋىستارى ەر ادامنىڭ جىلدار بويى ونى قورلاپ، اجىراسقاننان كەيىن دە قىزعانىپ، جانجال شىعارىپ كەلگەنىن ايتتى. اناسىز ەكى كامەلەتكە تولماعان بالا قالدى.
سوت پروسەسىندە 51 جاستاعى ايىپتالۋشى كىناسىن تولىق مويىنداپ، ىستەگەنىنە وكىنەتىنىن ءبىلدىردى. باستان بوستاندىعىنان ايىرۋدان باسقا، سوت ونى قايتىس بولعان ايەلدىڭ اعاسىنا مورالدىق زياندى وتەۋ رەتىندە 10 ميلليون تەڭگە تولەۋگە مىندەتتەدى.
قايتىس بولعان ايەلدىڭ تۋىسى جاننا نۇرعازينوۆا ۇكىمگە قاناعاتتانعانىن ءبىلدىردى: «مەن سوتتىڭ بۇل شەشىمىنە تولىق قوسىلامىن، ويتكەنى ءبىز ءدال وسىنداي جازانى كۇتكەن ەدىك. بالالارعا كەلسەك، سوتتا بىزگە قاجەتتى قۇجاتتاردى تەزىرەك جيناۋ كەرەكتىگىن ايتتى. ەندى قورعانشىلىق جانە قامقورشىلىق ورگاندارىمەن جۇمىس ىستەيمىز».