رەسەي فەدەراسياسى مەملەكەتتىك دۋماسىنىڭ «ادىلەتتى رەسەي» فراكسياسىنىڭ دەپۋتاتى سەرگەي ميرونوۆ ورتالىق ازيا ەلدەرىمەن ۆيزالىق رەجيم ەنگىزۋدى تاعى ءبىر رەت ۇسىندى، دەپ حابارلايدى infohub.kz سايتى.
پارتيا جەتەكشىسىنىڭ رەسمي سايتىندا ۆيدەو جاريالانعان بريفينگتە ميرونوۆ: «ءبىز جالپى ورتالىق ازيا ەلدەرىمەن ۆيزالىق رەجيم ەنگىزۋگە بولادى دەپ ەسەپتەيمىز. ءبىراق كەم دەگەندە بەلارۋس ءپرينسيپى بويىنشا جاسايىق. وندا مىناداي ءتارتىپ ورناتىلعان: ءبىر كاسىپكەرگە شەتەلدىك جۇمىس كۇشى قاجەت بولادى. ەڭ الدىمەن، بەلارۋستىڭ بۇل جۇمىستى ىستەي المايتىنىن دالەلدەۋ كەرەك. دالەلدەدىڭ، جاقسى. سوندا ەر ادامدار كىرىپ، تازا دالادا ۋاقىتشا ءۇي سالىنادى. بىزدەگىدەي ەلدى مەكەندە ەمەس. ولار بەلگىلى ءبىر جۇمىس ىستەپ، اقشا الىپ، كەتىپ قالادى. ەشقانداي وتباسى جوق»، — دەدى.
پارلامەنتاري رەسەيگە كىرەتىن ميگرانتتاردىڭ تەك 28 پايىزى عانا جۇمىس ىستەۋگە نيەتتى، ال قالعاندارى باسقا ماقساتتاردى كوزدەيتىنى تۋرالى دەرەكتەر كەلتىردى. سونداي-اق ول قىلمىس جاساعان ميگرانتتاردىڭ تۋىستارىن وتانىنا قايتارۋدى جانە كەلۋشىلەرگە ەكونوميكانىڭ بەلگىلى ءبىر سالالارىندا جۇمىس ىستەۋگە تىيىم سالۋدى ۇسىندى. «رەسەي فەدەراسياسى سۋبەكتىلەرىنىڭ جارتىسىنان كوبى مۇنداي زاڭداردى قابىلدادى. دۇرىس. فەدەرالدى دەڭگەيدە دە وسىلاي جاسايىق. مەنىڭ ويىمشا، ءىح شاقىرىلىمداعى مەملەكەتتىك دۋما وسى باعىتتا جۇمىس ىستەيدى»، — دەپ تۇيىندەدى ميرونوۆ.
سونىمەن قاتار، دەپۋتات كەيبىر ارالاس جەكپە-جەك كلۋبتارىندا جاتتىعۋشىلاردىڭ كوپشىلىگى ميگرانتتار ەكەنىنە الاڭداۋشىلىق ءبىلدىردى. «كەز كەلگەن وڭىردەگى مما كلۋبىنا كىرىڭىز! وندا بىزدىكىلەر جوق، ءبارى ميگرانت! ولار نەگە دايىندالىپ جاتىر؟ نە ءۇشىن؟ بۇل قاتتى الاڭداتادى!» — دەدى ميرونوۆ.
بۇعان دەيىن ميرونوۆ ورتالىق ازيا ەلدەرىمەن ۆيزالىق رەجيم ەنگىزۋ تاقىرىبىن كوتەرگەن بولاتىن؛ ونىڭ ءسوزى الەۋمەتتىك جەلىلەردە تارالدى.