الماتىدا تاريحتاعى العاشقى FIDE ۋنيۆەرسيتەتتەر اراسىنداعى كوماندالىق الەم چەمپيوناتى — FIDE World University Team Chess Championship-2026 ەكىنشى ويىن كۇنى اياقتالىپ، پلەي-وففقا شىققان العاشقى كوماندالار بەلگىلى بولدى. ءتورت كوماندا شيرەك فينالعا مەرزىمىنەن بۇرىن جولداما الدى، دەپ حابارلايدى infohub.kz سايتى.
ورال تاۋ-كەن ۋنيۆەرسيتەتىنىڭ (رەسەي) كومانداسى ءمىنسىز ونەر كورسەتىپ، بارلىق ءتورت ماچتا 4:0 ەسەبىمەن جەڭىسكە جەتتى. كەزەكتى تۋردا اۆستراليالىقتاردى گروسسمەيستەرلەر ارسەني نەستەروۆ، رۋديك ماكاريان، سەرگەي لوبانوۆ جانە حالىقارالىق شەبەر لەيا گاريفۋللينا جەڭدى.
ا توبىندا رەسەيلىكتەرمەن بىرگە پلەي-وففقا گارۆاردتىق امەريكاندىقتار شىقتى. گارۆارد ۋنيۆەرسيتەتىنىڭ كومانداسى قىتايلىقتاردى جەڭىپ، ەكاتەرينبۋرگتىكتەردەن نەبارى جارتى ۇپايعا قالىپ وتىر. توپتىق كەزەڭنىڭ سوڭعى تۋرىندا بۇل كوماندالار تورتتىكتە بىرىنشىلىك ءۇشىن سىنعا تۇسەدى. گارۆاردتىقتاردىڭ قۇرامى ونشا قورقىنىشتى ەمەس: حالىقارالىق شەبەر اكيرا ناكادا، ايەلدەر اراسىنداعى حالىقارالىق شەبەر ەللەن ۋونگ، سونداي-اق اتاعى جوق دەرەك دجين مەن دەيۆين يين.
ۆ توبىندا پلەي-وففقا جولدامانى امەريكاندىق سەنت-لۋيس ستۋدەنتتەرى مەرزىمىنەن بۇرىن قامتاماسىز ەتتى. گروسسمەيستەرلەر سۋبرامانيام بحارات (ءۇندىستان)، ۆيكتور گازيك (سلوۆاكيا)، نيكولوزي كاچاراۆا (گرۋزيا) جانە ايەلدەر گروسسمەيستەرى تاليا كەرۆانتەس-لاندەيرو (اقش) بار حالىقارالىق قۇراما ەكىنشى كۇنى وڭتۇستىكافريكالىقتاردى تاس-تالقان ەتتى.
توپتان شىققان اقش-تىڭ ءۇشىنشى كومانداسى — داللاس. تەحاس ۋنيۆەرسيتەتىنىڭ قۇرامىندا الەمنىڭ تۇكپىر-تۇكپىرىنەن كەلگەن ستۋدەنتتەر وينايدى: گروسسمەيستەرلەر اديتجا سامانت، چاتتەردجي كۋستاۆ (ەكەۋى دە — ءۇندىستان)، ياير پارحوۆ (يزرايل)، سونداي-اق ايەلدەر گروسسمەيستەرى مەيلي-دجەيد ۋەللە (كانادا).
قازاق ۇلتتىق سپورت ۋنيۆەرسيتەتىنىڭ قۇراماسى شيرەك فينالعا جولداما الۋعا ءبىر قادام قالدى. ءتورتىنشى تۋردا استانالىقتار وكسفوردتىقتاردى بارلىق پارتيادا جەڭدى. جەڭىسكە حالىقارالىق شەبەرلەر ساتبەك احمەدينوۆ، ارىستان يسانجۋلوۆ، مەرۋەرت كاماليدەنوۆا، سونداي-اق ازىرگە اتاعى جوق اليشەر ماجكەنوۆ قول جەتكىزدى.
D توبىندا ەكىنشى ورىندا چەمپيونات يەلەرى تۇر. ءال-فارابي اتىنداعى قازۇۋ كومانداسى ءتورتىنشى تۋردا ءۇشىنشى تۋرداعى اۋىر جەڭىلىسى ءۇشىن يندونەزيالىقتاردان رەۆانش الدى. جەڭىسكە سۋلتان امانجول جانە كورشى قىرعىزستاننان كەلگەن اسەل لەسبەكوۆا جەتتى.
AlmaU كومانداسى دا شيرەك فينالعا شىعۋ مۇمكىندىگىن جوعالتقان جوق. كەمبريدجبەن تەڭ ويىننان كەيىن ولار گرەكتەردەن نەبارى 0،5 ۇپايعا قالىپ وتىر. بريتاندىقتارمەن ماچتىڭ ەكىنشى جارتىسىندا گروسسمەيستەر جانگير بيجيگيتوۆ پەن دياس اليمبەتوۆ جەڭىسكە جەتتى.
ەرتەڭ، 5ء-شى جانە 6-شى تۋرلاردان كەيىن شيرەك فينالدىڭ تولىق قۇرامى انىقتالادى. دوڭگەلەك جۇيە بويىنشا وتەتىن ماچتار ءار تورتتىكتەن ەكى ۇزدىك كوماندانى انىقتايدى. ودان ءارى پلەي-وفف: شيرەك فينال، جارتىلاي فينال، 3ء-شى ورىن ءۇشىن ماچ جانە فينال.
ويىندار ءتورت تاقتادا وتەدى. ءار كوماندا قۇرامىندا كەمىندە ءبىر ەر جانە كەمىندە ءبىر ايەل بولۋى كەرەك. ۋاقىت باقىلاۋى — 45 مينۋت پليۋس ءار جۇرىسكە 30 سەكۋند، ءبىرىنشى جۇرىستەن باستاپ.
ءتۋرنيردى فيدە ق ر تۋريزم جانە سپورت مينيسترلىگىمەن، ق ر عىلىم جانە جوعارى ءبىلىم مينيسترلىگىمەن، قازاقستان شاحمات فەدەراسياسىمەن جانە الماتى قالاسى اكىمدىگىمەن بىرلەسىپ ۇيىمداستىرۋدا. باس سەرىكتەستەر — Freedom كومپانيالار توبى جانە «شاپاعات» كورپوراتيۆتىك قورى. جالپى جۇلدە قورى — €50 مىڭ. چەمپيوندارعا €25 مىڭ، ۆيسە-چەمپيوندارعا — €15 مىڭ، ءۇشىنشى ورىن العان كوماندا €10 مىڭدى بولىسەدى.