كولۋمبيالىق ءانشى شاكيرانىڭ ورتالىق ازياداعى العاشقى كونسەرتى «بىشكەك ارەنا» عيماراتىندا وتەدى. الەم جۇلدىزى قىرعىزستان استاناسىندا 18 قازاندا ونەر كورسەتەدى. بيلەتتەردى ساتۋ 1 قازاندا باستالعان بولاتىن، دەپ حابارلايدى infohub.kz سايتى.
الەۋمەتتىك جەلى قولدانۋشىلارى بيلەتتەردىڭ، اسىرەسە ەڭ ارزان سەكتورلاردىڭ، العاشقى مينۋتتاردا-اق ساتىلىپ كەتەتىنىن كۇتكەن. الايدا 13:00-دەگى دەرەكتەرگە سايكەس، 12 مىڭ سومدىق بيلەتتەر شىنىمەن تاۋسىلعان، ءبىراق 13،5 مىڭ سومدىق بىرنەشە سەكتور ءالى دە ساتىلىمدا. جالپى العاندا، مەملەكەتتىك بيلەت ساتۋ سايتىنىڭ مالىمەتىنشە، ستاديوننىڭ جارتىسىنا جۋىعى بوس.
Threads جەلىسىندە كەيبىر قولدانۋشىلار بيلەت ساتىپ الۋدى كۇتە تۇرۋعا كەڭەس بەرەدى — ويتكەنى ساۋىردە شاكيرانىڭ الماتىعا كەلەتىنى جاريالانعان ەدى. ولار دالەل رەتىندە «استانا كونسەرت» كومپانياسىنىڭ پروديۋسەرى ماليك حاسەنوۆتىڭ سوزدەرىن كەلتىرەدى. الەۋمەتتىك جەلىدەگى «شاكيرانىڭ قازاقستانداعى كونسەرتىن كۇتىپ، بيلەت ساتىپ الماۋ كەرەك پە؟» دەگەن سۇراققا ول: «كۇتە تۇرىڭىزدار»، — دەپ جاۋاپ بەرگەن.
الايدا قازاقستاندىقتاردىڭ ءبىرازى بىشكەككە بارۋعا نيەتتى.
«الماتىلىقتار، جالپى جينالىس! شاكيرا بىشكەكتە؟! شىنىمەن بە؟! ءبىز WhatsApp-تا چات اشىپ قويدىق، بەنزينگە اقشا جيناپ، ءقوناقۇي برونداپ جاتىرمىز! جۇرەتىن جەر دە الىس ەمەس، قوردايدان اسىپ، جولدا ىستىق سامسا الىپ، مىنە، ستاديونمەن بىرگە «Whenever، Wherever» ءانىن ايقايلاپ ايتىپ ءجۇرسىڭ! بىشكەك، الماتىدان كەلگەن دەسانتتى قارسى ال، ءبىز جولعا شىقتىق!»
«شاكيرانىڭ بيلەتتەرىنە قانداي باسەكە بار ەكەنىن تۇسىنۋلەرىڭىز ءۇشىن ايتايىن. بۇگىن اناما گيپس سالدى، كەشە قۇلاپ قالعان، ءبىراق ول قۇربىلارىمەن بىرگە 13،5 مىڭدىق سەكتورعا بيلەت ساتىپ الىپ: «18-ىنە دەيىن جازىلادى»، — دەپتى»، — دەپ جازادى قولدانۋشىلار.
قىرعىزستان تۇرعىندارى بيلەت قۇنى ورتاشا جالاقى الاتىن ادامعا شاقتالماعانىن اتاپ وتەدى. راس، ولارعا ءادىل جاۋاپ بەرىلەدى: وسىنداي دەڭگەيدەگى ءارتىس كونسەرتتى جوسپارلاعاندا ءبىر ەلگە ەمەس، تمد-نىڭ بىرنەشە ەلىنە باعدارلايدى. ەسكە سالايىق، «بىشكەك ارەنا» 51 مىڭ كورەرمەنگە ارنالعان.
قازاقستاندىق ءىرى جۇلدىزدار كونسەرتىنىڭ ۇيىمداستىرۋشىلارىنا قىرعىزستانمەن باسەكەلەسۋ قيىنعا سوعۋى مۇمكىن، ويتكەنى الەمدىك دەڭگەيدەگى ءارتىستىڭ كەلۋىن ۇلكەن الاڭدا وتەۋ الدەقايدا جەڭىل. ونداي جاعدايدا كورەرمەندەر ءۇشىن بيلەت قۇنى دا ارزان بولادى. سونىمەن قاتار، بىشكەككە الماتىدان جەتۋ سالىستىرمالى تۇردە وڭاي — دەمەك، بۇرىن قازاقستاننىڭ وڭتۇستىك استاناسىنا كەلگەن كورەرمەندەر ءۇشىن قىرعىزستانعا بارۋ قيىندىق تۋدىرمايدى.
بۇعان دەيىن Kursiv LifeStyle «سپورت قۇرىلىستارى ديرەكسياسى» ج ش س باسشىسى ەسەت بايتاسوۆقا سىلتەمە جاساپ، كولۋمبيالىق جۇلدىز 2026 جىلى الماتىعا كەلەتىنىن جازعان بولاتىن.