قازاقستاندىق UFC وكىلى شاۆكات راحمونوۆتىڭ جاتتىقتىرۋشىسى ەدۋارد بازروۆ سپورتشىنىڭ دەنساۋلىق جاعدايىنا بايلانىستى 2026 جىلى وكتاگونعا ورالا المايتىنىن مالىمدەدى، دەپ حابارلايدى infohub.kz.
بازروۆتىڭ ايتۋىنشا، راحمونوۆتىڭ جاعدايى تولىققاندى دايىندىق جۇرگىزۋگە مۇمكىندىك بەرمەيدى. الايدا دارىگەرلەر جاتتىعۋلارعا قاتىسۋعا تىيىم سالمايدى جانە وڭالتۋ بارىسىنا وڭ بولجام جاسايدى. «ءقازىر شاۆكات اياعىن قالپىنا كەلتىرىپ جاتىر، كۇنىنە ءبىر رەت جاتتىعادى. ءبىز دەنە شىنىقتىرۋ جانە بوكس بويىنشا قازىرگى مۇمكىندىكتەرىمىزدى پايدالانىپ جاتتىعۋلار جاسايمىز. ونىڭ ناقتى ورالۋ مەرزىمىن ءدال ايتا المايمىز. ويتكەنى جاراقاتتان كەيىن اركىم ءارتۇرلى قالپىنا كەلەدى. مەنىڭ ويىمشا، كەلەسى جىلى. مەنىڭ پايىمداۋىمشا، 2027 جىلدىڭ اقپانىندا ول جەكپە-جەككە تولىق دايىن بولۋى مۇمكىن، ءبىراق شاۆكات راحمونوۆتىڭ قاشان تولىق ساۋىعاتىنىن ءدال ايتۋ ءالى مۇمكىن ەمەس»، – دەدى ەدۋارد بازروۆ.
جاتتىقتىرۋشىنىڭ سوزىنشە، راحمونوۆ ساۋىققاننان كەيىن وعان بىردەن توپ قارسىلاس تاعايىندالادى، ويتكەنى جاراقات العان كەزدە قازاقستاندىق UFCء-دىڭ جارتىلاي ورتا سالماق دارەجەسىندەگى رەيتينگتە ەكىنشى ورىندا تۇر ەدى. ەسكە سالايىق، مامىر ايىنىڭ سوڭىندا شاۆكات راحمونوۆ ۇزاق ۇزىلىستەن كەيىن جاتتىعۋ پروسەسىنە ورالعانى بەلگىلى بولدى. راحمونوۆتىڭ سوڭعى جەكپە-جەگى 2024 جىلدىڭ جەلتوقسانىندا UFC 310 تۋرنيرىندە ءوتىپ، وندا يرلانديالىق يەن ماچادو گەرريدى ءبىراۋىزدان شەشىممەن جەڭىپ، رەكوردىن ساقتاپ قالدى — 19–0. وسىدان كەيىن ول دەنساۋلىق پروبلەمالارىنا بايلانىستى وكتاگونعا ۇزاق ۋاقىت شىقپاي، UFCء-دىڭ جارتىلاي ورتا سالماق رەيتينگىنىڭ الدىڭعى قاتارىنان شىعىپ قالدى.