شىمكەنتتە 21 جاستاعى نۇراي سەرىكبايدى ءولتىرۋ ءىسى بويىنشا رەزونانستىق سوت پروسەسى اياقتالدى. ايىپتالۋشى شەرحان ايماحان ءومىر بويى باس بوستاندىعىنان ايىرۋعا سوتتالدى، دەپ حابارلايدى infohub.kz سايتى.
ۇكىم شىمكەنتتىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا جاريالاندى. سوتتان ءمالىم ەتكەندەي، ايماحان جازاسىن ەرەكشە قاۋىپسىزدىك مەكەمەسىندە وتەيتىن بولادى.
ءتوراعالىق ەتۋشى سۋديا سامميدين تەمىرالييەۆ 28 جاستاعى شەرحان ايماحاننىڭ قازاقستان رەسپۋبليكاسى قىلمىستىق كودەكسىنىڭ ءۇش اۋىر بابى بويىنشا كىنالى دەپ تانىلعانىن مالىمدەدى: 99-باپتىڭ 2-بولىگىنىڭ 5-تارماعى (اسا قاتىگەزدىكپەن جاسالعان كىسى ءولتىرۋ)، 115-1-باپ (ستالكينگ، ياعني زاڭسىز قۋدالاۋ) جانە 125-1-باپ (نەكەگە تۇرۋعا ماجبۇرلەۋ). ۇكىم ازىرگە زاڭدى كۇشىنە ەنگەن جوق.
ەسكە سالايىق، قىلمىس 11 قاڭتار كۇنى كەشكە شىمكەنتتە تولەمەتوۆ پەن وتەگەنوۆ كوشەلەرىنىڭ قيىلىسىنداعى جاياۋ جۇرگىنشىلەر وتكەلىندە بەينەكامەراعا ءتۇسىپ قالعان. كادرلاردا قىزدىڭ قاشۋعا تىرىسقانى، سودان كەيىن قارسىلىق كورسەتكەنى، ال جىگىتتىڭ ونى ۇرىپ، پىشاقتاعانى كورىنەدى. وسىدان كەيىن ول وقيعا ورنىنان قاشىپ كەتكەن.
كەيىن كۇدىكتى شىمكەنتتەن 10 شاقىرىم جەردەگى اشىق جەردە ۇستالدى. قايتىس بولعان قىزدىڭ تۋىستارىنىڭ ايتۋىنشا، ول ستالكەر بولعان. ساۋىردە كۇدىكتى ساراپتاما جۇرگىزۋ ءۇشىن ارنايى مەكەمەگە جىبەرىلىپ، ساراپتاما ونى ەسى دۇرىس دەپ تانىدى. مامىر ايىنىڭ سوڭىندا ول تالعارداعى مەديسينالىق ورتالىقتان شىمكەنتكە قايتا جەتكىزىلدى.
سوت پروسەسى شىلدەدە باستالدى. پروكۋرور ايىپتاۋ اكتىسىن وقىپ، نۇراي سەرىكبايعا 35 پىشاق جاراقاتى سالىنعانىن ايتتى. ءسوز سايىسى بارىسىندا پروكۋراتۋرا ايىپتالۋشىعا ءومىر بويى باس بوستاندىعىنان ايىرۋ جازاسىن سۇرادى. سونىمەن قاتار، قايتىس بولعان قىزدىڭ وتباسى ايىپتالۋشىدان 10 ميلليارد تەڭگەدەن استام ماتەريالدىق جانە مورالدىق شىعىندى وتەۋدى تالاپ ەتتى.