شىعىس قازاقستان وبلىسىندا كوشى-قون قىزمەتىنىڭ قىزمەتكەرلەرى قوس ازاماتتىعى ءۇشىن 38 ادامدى جاۋاپكەرشىلىككە تارتتى. ال التاي اۋدانىنىڭ 21 جاستاعى تۇرعىنى باسقا مەملەكەتتىڭ ازاماتتىعىن العان سوڭ، ونىڭ قازاقستاندىق پاسپورتى الىندى، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ ءباسپاسوز قىزمەتى اتاپ وتكەندەي، قازاقستان رەسپۋبليكاسىنىڭ زاڭناماسى قوس ازاماتتىققا جول بەرمەيدى. دەگەنمەن شىعىس قازاقستان وبلىسىنىڭ كوشى-قون قىزمەتى قىزمەتكەرلەرى باسقا مەملەكەتتىڭ ازاماتتىعىن العاننان كەيىن بۇل تۋرالى حابارلاماي، قۇجاتتارىن پايدالانۋدى جالعاستىرىپ جۇرگەن ادامداردى ءالى دە انىقتاپ وتىر.
جىل باسىنان بەرى 620-دان استام ادامنىڭ قازاقستان رەسپۋبليكاسىنىڭ ازاماتتىعىنان ايىرىلعانى تىركەلدى. 38 ادام ازاماتتىق سالاسىنداعى زاڭناما تالاپتارىن بۇزعانى ءۇشىن اكىمشىلىك جاۋاپكەرشىلىككە تارتىلدى.
«انىقتالعان فاكتىلەردىڭ باسىم بولىگى كورشىلەس مەملەكەتتەردىڭ ازاماتتىعىن العان ادامدارعا قاتىستى»، — دەدى شقو پد كوشى-قون قىزمەتى باسقارماسىنىڭ باستىعى رينات شكيبايەۆ.
وسىنداي جاعدايلاردىڭ ءبىرى التاي اۋدانىنىڭ 21 جاستاعى تۇرعىنىنان انىقتالدى. ول باسقا مەملەكەتتىڭ ازاماتتىعىن العان، الايدا بۇل تۋرالى ۋاكىلەتتى ورگاندارعا ۋاقىتىلى حابارلاماعان. تەكسەرۋ بارىسىندا ونىڭ قۇجاتتارى الىنىپ، ازاماتتىعىنان ايىرىلۋى تىركەلدى.