شىعىس قازاقستان وبلىسىنداعى قاراعۇجى وزەنى «اپەلسين» تۇسكە بويالدى. سەبەپ — «ۆوستوكسۆەتمەت» ءجشس-نىڭ بۇرىنعى يۋبيلەينىي-سنەگيريحا كەنىشىنىڭ شاحتا سۋلارى. بۇل جەردە بۇزۋشىلىقتار انىقتالعان، دەپ حابارلايدى infohub.kz.
وزەننىڭ ءتۇسى وزگەرگەننەن كەيىن ەكولوگيا دەپارتامەنتى 31 شىلدەدە تەكسەرۋ جۇرگىزدى. ماماندار كەنىش اۋماعىنان جەر استىنان شىعىپ جاتقان شاحتا سۋلارى جينالىپ، قاراعۇجىعا قۇياتىن بۇلاققا تۇسەتىنىن انىقتادى.
«تەكسەرۋ بارىسىندا كەنىشتى جويۋ جۇمىستارىنىڭ ءتيىستى دەڭگەيدە ۇيىمداستىرىلماعانى انىقتالدى. سونىڭ سالدارىنان جەر استىنان جەر بەتىنە شاحتا سۋلارىنىڭ كوپتەپ اعىپ شىعۋى بايقالدى»، — دەلىنگەن حابارلامادا.
بۇل سۋلاردىڭ وزەنگە قۇيىلۋى ونىڭ كورسەتكىشتەرىنىڭ وزگەرۋىنە اكەلدى. «اتالعان بۇزۋشىلىقتار قاراعۇجى وزەنى سۋىنىڭ „اپەلسين“ تۇسكە بويالۋىنا، ونىڭ ساپالىق جانە حيميالىق كورسەتكىشتەرىنىڭ ناشارلاۋىنا، سۋ وبەكتىسىنىڭ تابيعي گيدروحيميالىق رەجيمىنىڭ بۇزىلۋىنا اكەلدى»، — دەپ قوستى ەكولوگيا دەپارتامەنتىندە.
ەكولوگتار لاستاۋشى زاتتاردىڭ وزەن اعىسىمەن ءارى قاراي تارالۋ ءقاۋپىن دە اتاپ ءوتتى. تەكسەرۋ ناتيجەلەرى بويىنشا بۇل قورشاعان ورتانىڭ جاي-كۇيىن ناشارلاتىپ، ايتارلىقتاي ەكولوگيالىق زالال كەلتىرەدى.
سونىمەن قاتار، لاستانۋ تەك سۋعا عانا اسەر ەتكەن جوق. ماماندار شاحتا سۋلارىنداعى زاتتاردىڭ توپىراققا سىڭگەنىن انىقتادى. «شاحتا سۋلارىنداعى لاستاۋشى زاتتار توپىراق جامىلعىسىنا ەنىپ، ونىڭ حيميالىق قۇرامىنىڭ وزگەرۋىنە اكەلدى»، — دەلىنگەن ۆەدومستۆو حابارلاماسىندا.