شىعىس قازاقستان وبلىسىندا پوليسيا قىزمەتكەرى ويلانباستان كارىز قۇدىعىنا ءتۇسىپ، ەكى جۇمىسشىنى قۇتقاردى، دەپ حابارلايدى infohub.kz.
وبلىستىق پوليسيا دەپارتامەنتى ءباسپاسوز قىزمەتىنىڭ مالىمەتىنشە، 20 تامىزدا ساعات 14:30 شاماسىندا «مولودەجنىي» كوممۋنالدىق مەملەكەتتىك كاسىپورنىنىڭ 1985 جىلى تۋعان ەكى قىزمەتكەرى ۇلان اۋدانى قاسىم قايسەنوۆ كەنتىندەگى №11 ءۇيدىڭ جانىندا كارىز قۇبىرلارىن تازالاپ جۇرگەن.
جۇمىس بارىسىندا ەر ادامداردىڭ ءبىرى كارىز ليۋكىنە ءتۇسىپ، ەسىن جوعالتقان. ارىپتەسىنە كومەكتەسپەك بولعان ەكىنشى جۇمىسشى دا سوڭىنان تۇسكەن، الايدا ول دا ەسىن جوعالتقان.
بولعان جاعدايدى ۇلان اۋدانىنىڭ كريميناليسى، پوليسيا كاپيتانى اسەت ناعاشبايەۆ بايقاپ قالعان. ول ماڭايداعى ليۋك ماڭىندا ادامداردى كورىپ، دابىل قاققان داۋىستاردى ەستىپ، بۇل تۋرالى ۋچاسكەلىك ينسپەكتورعا دەرەۋ حابارلاعان.
وقيعا ورنىنا پوليسيا مايورى نۇرداۋلەت توتەپوۆ كەلگەن. ءار سەكۋندتىڭ ماڭىزدى ەكەنىن تۇسىنگەن ول بىردەن ارقان سۇراپ، ونى بەكىتىپ، ليۋككە تۇسكەن.
«ءوزىن قاۋىپكە تىككەنىن بىلە تۇرا، پوليسەي توقتاپ قالمادى. بىرنەشە مينۋت ىشىندە ول الدىمەن ءبىر جۇمىسشىنىڭ، سودان كەيىن ەكىنشىسىنىڭ جەر بەتىنە شىعۋىنا كومەكتەستى. وسىدان كەيىن ەكەۋىن دە كەلگەن جەدەل جاردەم بريگاداسىنا تاپسىردى»، — دەپ حابارلادى شىعىس قازاقستان وبلىسى پوليسيا دەپارتامەنتىندە.
پوليسيا كاپيتانى اسەت ناعاشباەۆتىڭ سەرگەكتىگى مەن پوليسيا مايورى نۇرداۋلەت توتەپوۆتىڭ باتىل ارەكەتىنىڭ ارقاسىندا قايعىلى وقيعانىڭ الدىن الۋ مۇمكىن بولدى.