شىعىس قازاقستان وبلىسىنىڭ تۇرعىنى تالدىقورعانعا كەلىپ، جەكە ءۇي جالداپ، جاسىرىن ناركولابوراتوريا ۇيىمداستىرعانى ءۇشىن 10 جىلعا باس بوستاندىعىنان ايىرىلدى، دەپ حابارلايدى infohub.kz سايتى.
جەتىسۋ وبلىسى پروكۋراتۋراسىنىڭ رەسمي سايتىندا ءمالىم بولعانداي، جەتىسۋ وبلىسى بويىنشا قىلمىستىق ىستەر جونىندەگى مامانداندىرىلعان اۋدانارالىق سوتى شىعىس قازاقستان وبلىسىنىڭ تۇرعىنىنا قاتىستى ايىپتاۋ ۇكىمىن شىعاردى. ەر ادام الدىن الا ءسوز بايلاسۋ ارقىلى ادامدار توبىمەن ساتۋ ماقساتىندا ەرەكشە ءىرى مولشەردە پسيحوتروپتىق زاتتاردى زاڭسىز دايىنداعانى ءۇشىن كىنالى دەپ تانىلدى.
2025 جىلى Telegram ارقىلى بايلانىستا بولعان ادامداردىڭ ۇسىنىسىمەن ول تالدىقورعانعا كەلىپ، جەكە ءۇي جالداعانى انىقتالدى. پروكۋراتۋرا دەرەگىنشە، سول ۇيدە ول مەفەدرون دايىندايتىن جاسىرىن زەرتحانا ۇيىمداستىرعان.
ءتىنتۋ بارىسىندا 4،5 كەلىدەن استام ەسىرتكى تابىلىپ، تاركىلەندى.
جاسالعان اسا اۋىر قىلمىستىڭ سيپاتى مەن قوعامدىق قاۋىپتىلىك دارەجەسىن ەسكەرە وتىرىپ، سوت وعان 10 جىلعا باس بوستاندىعىنان ايىرۋ جازاسىن تاعايىندادى.
ۇكىم زاڭدى كۇشىنە ەنگەن جوق.