شىعىس قازاقستان وبلىسىندا اكىمنىڭ جاڭا ورىنباسارى تاعايىندالدى. ول — بۇعان دەيىن التاي اۋدانىنىڭ اكىمى قىزمەتىن اتقارعان رەنات قۇرمامبايەۆ، دەپ حابارلايدى infohub.kz سايتى.
وبلىس اكىمدىگىنىڭ مالىمەتىنشە، رەنات تلەۋحان ۇلى اۋىل شارۋاشىلىعى، ۆەتەريناريا، جەر قاتىناستارى جانە تابيعات پايدالانۋ ماسەلەلەرىنە جەتەكشىلىك ەتەتىن بولادى.
رەنات قۇرمامبايەۆ 1980 جىلى 25 قاڭتاردا ۇلكەن نارىم اۋدانىنىڭ نوۆو-بەرەزوۆكا اۋىلىندا دۇنيەگە كەلگەن. 1998 جىلى شىعىس قازاقستان گۋمانيتارلىق كوللەدجىن «ەڭبەك وقىتۋ» ماماندىعى بويىنشا، 2001 جىلى شىعىس قازاقستان مەملەكەتتىك ۋنيۆەرسيتەتىن «اۋىل شارۋاشىلىعى ءوندىرىسىن مەحانيكالاندىرۋ بويىنشا كاسىپتىك وقىتۋ» ماماندىعى بويىنشا، ال 2006 جىلى قازاقستان-امەريكا ەركىن ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن.
مەملەكەتتىك قىزمەتتەگى ەڭبەك جولىن 2003 جىلى كاتونقاراعاي اۋداندىق مادەنيەت ءبولىمىنىڭ جاستارمەن جۇمىس جونىندەگى باس مامانى بولىپ باستاعان. 2005 جىلى كاتونقاراعاي اۋدانىنىڭ ىشكى ساياسات، مادەنيەت جانە تىلدەردى دامىتۋ ءبولىمىنىڭ باس مامانى بولىپ جۇمىس ىستەگەن. 2005-2008 جىلدارى كاتونقاراعاي اۋدانى اكىمى اپپاراتىنىڭ كادرلىق جانە مەملەكەتتىك-قۇقىقتىق جۇمىس ءبولىمىنىڭ مەڭگەرۋشىسى قىزمەتىن اتقارعان.
2008-2009 جىلدارى كاتونقاراعاي اۋدانى اكىمى اپپاراتىنىڭ ۇيىمداستىرۋ-كادرلىق ءبولىمىن باسقارعان. 2009-2011 جىلدارى شىعىس قازاقستان وبلىسى اكىمى اپپاراتىنىڭ ۇيىمداستىرۋ-ينسپەكتورلىق ءبولىمىنىڭ باس ينسپەكتورى بولىپ قىزمەت ەتكەن.
ءار جىلدارى كاتونقاراعاي جانە ۇلان اۋداندارىنىڭ اكىمى، شقو اكىمى اپپاراتى باسشىسىنىڭ ورىنباسارى جانە التاي اۋدانى اكىمىنىڭ ورىنباسارى قىزمەتتەرىن اتقارعان. 2023 جىلدىڭ قاراشاسىنان باستاپ وسى ۋاقىتقا دەيىن التاي اۋدانىنىڭ اكىمى بولعان.