شىعىس قازاقستان وبلىسىندا تابيعي ءورتتى جويۋ جۇمىستارى جالعاسۋدا. وت قۇرعاق ءشوپتى، اعاشتاردى جانە ورمان توسەنىشىن شارپىدى، دەپ حابارلايدى infohub.kz سايتى.
توتەنشە جاعدايلار مينيسترلىگى ءباسپاسوز قىزمەتىنىڭ مالىمەتىنشە، وبلىستىڭ ۇلان اۋدانىنداعى «اسۋ-بۇلاق ورمان شارۋاشىلىعى» كوممۋنالدىق مەملەكەتتىك مەكەمەسىنىڭ اۋماعىندا تابيعي ءورتتى ءسوندىرۋ جۇمىستارى جالعاسۋدا. وت قۇرعاق ءشوپتى، اعاشتاردى جانە ورمان توسەنىشىن شارپىعان.
ۆەدومستۆونىڭ ايتۋىنشا، ءورتتى سوندىرۋگە جەلدىڭ اۋىسپالى باعىتى، تىك بەتكەيلەر، اۋا تەمپەراتۋراسىنىڭ جوعارى بولۋى جانە كىرەبەرىس جولداردىڭ بولماۋى قيىندىق تۋدىرۋدا. كۇشتەر مەن قۇرالداردى جەدەل باسقارۋ ءۇشىن وقيعا ورنىندا وبلىستىق توتەنشە جاعدايلار دەپارتامەنتىنىڭ باستىعى ورنالاسقان شتاب قۇرىلدى. شتاب بارلىق تارتىلعان قىزمەتتەردىڭ ءىس-قيمىلىن ۇيلەستىرىپ، جەرۇستى جانە اۋە توپتارىنىڭ ءوزارا ءىس-قيمىلىن قامتاماسىز ەتىپ، ءورتتى ودان ءارى جويۋ بويىنشا شەشىمدەر قابىلدايدى.
ءورتتى سوندىرۋگە تجم، ەكولوگيا جانە تابيعي رەسۋرستار مينيسترلىگىنىڭ «قازاۆياورمانقورعاۋ»، ۇلتتىق قاۋىپسىزدىك كوميتەتى دەپارتامەنتى جانە جەرگىلىكتى اتقارۋشى ورگانداردىڭ كۇشتەرى مەن قۇرالدارى — شامامەن 220 ادام جانە 43 تەحنيكا، سونداي-اق ءتجم-نىڭ بەس «قازاۆياقۇتقارۋ» تىكۇشاعى، شىعىس قازاقستان وبلىسى اكىمدىگىنىڭ جانە ۇقك دەپارتامەنتىنىڭ اۆياسياسى تارتىلدى.
قيىن جەتەتىن ۋچاسكەلەردە تجم تىكۇشاقتارى، وبلىس اكىمدىگىنىڭ جانە ۇقك دەپارتامەنتىنىڭ اۆياسياسى سۋ قۇياتىن قۇرىلعىلارمەن جۇمىس ىستەيدى. قازىرگى ۋاقىتتا 100 ءتۇسىرۋ جاسالىپ، 288 توننا سۋ توگىلدى، دەپ حابارلادى ۆەدومستۆودا.