17 تامىز كەشكە شىمكەنتتە ءجاسوسپىرىم پىشاق جاراقاتىن العان وقيعا بولدى. قالالىق دەندروساياباققا كىرە بەرىستەگى فۋدتراك ماڭىندا جانجال شىققان، دەپ حابارلايدى infohub.kz سايتى.
Qumash.kz باسىلىمىنىڭ مالىمەتىنشە، الەۋمەتتىك جەلىلەردە وقيعا ورنىنان فوتوسۋرەتتەر پايدا بولعان. جاريالانىم اۆتورى جانجالعا قاتىسۋشىلار فۋدتراكتىڭ كامەلەتكە تولماعان قىزمەتكەرلەرى بولعانىن ايتادى. حابارلامادا: «كەشكە شىمكەنتتەگى دەندروساياباققا بارىپ، وسىنداي كورىنىستى كوردىك. كىرە بەرىستەگى كاسسانىڭ قاسىندا فۋدتراك قىزمەتكەرلەرى ءبىر-بىرىن پىشاقپەن اياعىنان جارالادى. بۇل نە دەگەن زاڭسىزدىق، اتا-انالارى مەن باسشىلىعى قايدا قاراپ وتىر؟» دەلىنگەن.
شىمكەنت پوليسيا دەپارتامەنتى وقيعا فاكتىسىن راستاپ، سوتقا دەيىنگى تەرگەۋ باستالعانىن حابارلادى. ۆەدومستۆو: «دەنە جاراقاتىن كەلتىرۋ فاكتىسى بويىنشا قىلمىستىق ءىس قوزعالدى. وقيعاعا قاتىسۋشىلار انىقتالدى. جاراقات العان ءجاسوسپىرىم اۋرۋحاناعا جەتكىزىلدى. قازىرگى ۋاقىتتا وقيعانىڭ بارلىق ءمان-جايى، ونىڭ ىشىندە جانجالدىڭ سەبەپتەرى انىقتالۋدا»، — دەپ مالىمدەدى.
سونىمەن قاتار، پوليسيا كامەلەتكە تولماعانداردىڭ زاڭدى وكىلدەرىن جاۋاپكەرشىلىككە تارتۋ ماسەلەسىن قاراستىرىپ جاتىر.
بۇعان دەيىن سولتۇستىك قازاقستان وبلىسىندا ماس كۇيىندەگى ەر ادام مەديسينالىق كۋالاندىرۋعا اپارۋ كەزىندە ۋچاسكەلىك ينسپەكتورعا پىشاقپەن شابۋىل جاساعانى حابارلانعان بولاتىن. پوليسەي قويىلعان جاراقات العانىمەن، كۇدىكتىنى قارۋسىزداندىرىپ، كولىكتى توقتاتا العان. فاكتى بويىنشا قىلمىستىق ءىس قوزعالىپ، فيگۋرانت ۋاقىتشا ۇستاۋ يزولياتورىنا قامالدى.