شىمكەنتتە ءورت شىعىپ، اباي اۋدانىنداعى ارعىنبەكوۆ كوشەسىندە كافەگە جالعاسقان اسحانانىڭ شاتىرىن تۇگەل قامتىدى. قۇتقارۋشىلار عيماراتتان 50 ليترلىك وتتەگى باللونىن الىپ شىعىپ، وتتىڭ اۋدانى 200 شارشى مەتر كورشىلەس كافەگە تارالۋىن بولدىرمادى، دەپ حابارلايدى infohub.kz سايتى.
توتەنشە جاعدايلار مينيسترلىگىنىڭ ءباسپاسوز قىزمەتى حابارلاعانداي، شىمكەنتتىڭ 112 پۋلتىنە كافەگە جالعاسقان عيماراتتا ءورت شىققانى تۋرالى حابارلاما كەلىپ ءتۇستى.
«وقيعا ورنىنا تجم كۇشتەرى جىبەرىلدى. ءورت سوندىرۋشىلەر كەلگەندە جانىنداعى اسحانانىڭ شاتىرى تولىق وتقا ورانعانى انىقتالدى. قۇتقارۋشىلار بارلاۋ جۇرگىزىپ، ءورتتى سوندىرۋگە كىرىستى»، — دەدى ۆەدومستۆودا.
ءسوندىرۋ بارىسىندا عيماراتتان 50 ليترلىك وتتەگى باللونى ءقاۋىپسىز جەرگە الىنىپ شىعارىلدى. قۇتقارۋشىلاردىڭ ۋاقتىلى قولدانعان شارالارىنىڭ ارقاسىندا وتتىڭ تارالۋىن بولدىرماۋعا جانە اۋدانى 200 شارشى مەتر كافە عيماراتىن ورتتەن ساقتاپ قالۋعا مۇمكىندىك تۋدى.
ءورت 100 شارشى مەتر اۋماقتا ءسوندىرىلدى. زارداپ شەككەندەر جوق. ءورتتىڭ سەبەبى انىقتالۋدا.
«ەلەكتر قوندىرعىلارى كەرنەۋ استىندا تۇرسا جانە ەلەكتر قۋاتى وشىرىلمەسە، ءورتتى سۋمەن ءوز بەتىنشە سوندىرۋگە قاتاڭ تىيىم سالىنادى. بۇل ادام ومىرىنە ۇلكەن ءقاۋىپ توندىرەدى. ءورتتى بايقاساڭىز، دەرەۋ 112 نومىرىنە حابارلاسىڭىز»، — دەپ ەسكە سالدى تجم.