تۇركىستان وبلىسىنداعى بادام ستانسياسىنىڭ بەس كامەلەتكە تولماعان تۇرعىنى تاشكەنت — الماتى باعىتىنداعى جولاۋشىلار ۆاگونىنىڭ تەرەزەسىن سىندىردى. وقيعا ءۇشىن جاۋاپكەرشىلىك اتا-انالارىنا جۇكتەلدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالىنىڭ مالىمەتىنشە، وقيعا بادام — يگيليك ارالىعىندا بولعان. بەلگىسىز ادامدار جولاۋشىلار قۇرامىنىڭ سىرتقى تەرەزەسىن سىندىرعان.
جەدەل ىزدەستىرۋ شارالارى بارىسىندا شىمكەنت ستانسياسىنداعى كولىكتەگى پوليسيا باسقارماسىنىڭ قىزمەتكەرلەرى بۇزۋشىلاردى انىقتادى. ولار بادام ستانسياسىنىڭ 8، 9 جانە 10 جاستاعى بەس تۇرعىنى بولىپ شىقتى.
شىمكەنت ستانسياسىنداعى كولىكتەگى پوليسيا باسقارماسى باستىعىنىڭ ورىنباسارى ەسكەندىر بايمىرزاەۆتىڭ ايتۋىنشا، بالالار زاڭدى وكىلدەرىنىڭ قاتىسۋىمەن بولعان وقيعاعا قاتىستىلىعىن مويىندادى.
اتا-انالارعا قاتىستى كامەلەتكە تولماعانداردى تاربيەلەۋ جانە ولاردىڭ قاۋىپسىزدىگىن قامتاماسىز ەتۋ مىندەتتەرىن تيىسىنشە ورىنداماعانى ءۇشىن ماتەريالدار تولتىرىلدى. سوت شەشىمىمەن اتا-انالاردىڭ ءارقايسىسى ايىپپۇل تولەدى.
«ءجۇرىپ كەلە جاتقان پويىزداردىڭ تەرەزەسىن سىندىرۋ — بۇل بەيكۇنا بۇزاقىلىق ەمەس، جولاۋشىلار مەن تەمىرجول قىزمەتكەرلەرىنىڭ قاۋىپسىزدىگىنە ناقتى قاتەر. ءتىپتى ءبىر لاقتىرىلعان زات ادامداردىڭ جاراقات الۋىنا اكەلۋى مۇمكىن»، — دەدى ەسكەندىر بايمىرزايەۆ.