2024 جىلدىڭ ءساۋىر ايىندا شىمكەنت اۋەجايىندا FlyArystam اۋەكومپانياسىنىڭ الماتىدان ۇشىپ كەلگەن ۇشاعى قونۋ كەزىندە ۇشۋ-قونۋ جولاعىنا كىرگەن جابايى جانۋاردى قاعىپ كەتتى. وقيعا №55652 اسكەري ءبولىمىنىڭ جاۋاپكەرشىلىك ايماعىنداعى پەريمەترلىك قورشاۋدىڭ ءتيىستى دەڭگەيدە بولماۋىنان ورىن الدى، دەپ حابارلايدى infohub.kz سايتى.
باستاپقىدا ۇشاق ءيتتى قاعىپ كەتكەنى حابارلاندى، الايدا جۇرگىزىلگەن تەرگەۋ جانۋاردىڭ جابايى — بولجام بويىنشا شاقال ەكەنىن كورسەتتى. سوقتىعىسۋ سالدارىنان اۋە كەمەسىنىڭ بولشەكتەرى زاقىمداندى.
«كوميسسيا اۆياسيالىق وقيعانىڭ سەبەبى — №55652 اسكەري ءبولىمىنىڭ جاۋاپكەرشىلىك ايماعىنداعى پەريمەترلىك قورشاۋدىڭ بۇتىندىگىن ءتيىستى دەڭگەيدە قامتاماسىز ەتپەۋى دەگەن قورىتىندىعا كەلدى. تەرگەۋ ناتيجەسىندە جابايى جانۋاردىڭ (بولجام بويىنشا شاقالدىڭ) ۇشۋ الاڭىنا كەدەرگىسىز كىرىپ كەتۋىنە مۇمكىندىك بەرگەن تەسىكتەر انىقتالدى. ونىڭ قوزعالۋ باعىتى سولتۇستىكتەن وڭتۇستىككە قاراي بولدى. بۇل وقيعاعا جول بەرگەنى ءۇشىن جاۋاپكەرشىلىك اسكەري ءبولىمنىڭ لاۋازىمدى تۇلعالارىنا جۇكتەلدى»، — دەپ حابارلادى «شىمكەنت اۋەجايى» اق باسقارما ءتوراعاسىنىڭ مىندەتىن اتقارۋشى اليك گانەيەۆ.
اسكەريلەرگە ءوز جاۋاپكەرشىلىك ايماعىنداعى قورشاۋدى قاۋىپسىزدىك تالاپتارىنا ساي كەلتىرۋ، جانۋارلار مەن بوگدە ادامداردىڭ اەرودروم اۋماعىنا كىرۋىنە جول بەرمەۋ ۇسىنىلدى.
قازاقستاننىڭ اۆياسيالىق اكىمشىلىگى №55652 اسكەري ءبولىمىنىڭ جاۋاپكەرشىلىك ايماعىنداعى قورشاۋدىڭ ءبىر بولىگى كۇزەت جارىعى، بەينەباقىلاۋ جۇيەسى جانە قازۋعا قارسى قۇرىلعىنىڭ بولماۋى تۇرعىسىنان اۆياسيالىق قاۋىپسىزدىك تالاپتارىنا ساي كەلمەگەنىن اتاپ ءوتتى. ەسكەرتۋلەر ءالى كۇنگە دەيىن جويىلماعان، ونىڭ سەبەپتەرى وبەكتيۆتى، ونىڭ ىشىندە قازاقستان رەسپۋبليكاسى قورعانىس مينيسترلىگىنىڭ قارجىلاندىرۋ ماسەلەلەرى دە بار. سونىمەن بىرگە ۆەدومستۆودا شىمكەنت اۋەجايىنىڭ جاۋاپكەرشىلىك ايماعىنداعى پەريمەترلىك قورشاۋدىڭ جارامدى كۇيدە ەكەندىگىن، انىقتالعان تەسىكتەردىڭ جابىلعانىن ايتتى.