شىنار اقپاروۆا قازاقستاننىڭ وقۋ-اعارتۋ ءبىرىنشى ۆيسە-مينيسترى بولدى، دەپ حابارلايدى infohub.kz.
وقۋ-اعارتۋ مينيسترلىگىنىڭ ءباسپاسوز قىزمەتىنىڭ مالىمەتىنشە، بۇگىن ۆەدومستۆو باسشىسى جۇلدىز سۇلەيمەنوۆا ۇجىمعا بۇعان دەيىن ۆيسە-مينيستر قىزمەتىن اتقارعان شىنار اقپاروۆانى تانىستىردى.
«قازاقستان رەسپۋبليكاسى ۇكىمەتىنىڭ قاۋلىسىمەن شىنار قۋانىش قىزى اقپاروۆا قازاقستان رەسپۋبليكاسىنىڭ وقۋ-اعارتۋ ءبىرىنشى ۆيسە-مينيسترى بولىپ تاعايىندالدى. وسى تاعايىنداۋعا دەيىن ول 2025 جىلدىڭ قاراشاسىنان باستاپ وقۋ-اعارتۋ ۆيسە-مينيسترى قىزمەتىن اتقاردى»، — دەلىنگەن رەسمي حابارلامادا.
شىنار اقپاروۆا 1972 جىلى قاراعاندى وبلىسىندا دۇنيەگە كەلگەن. ول سەلينوگراد قارجى-ەكونوميكالىق تەحنيكۋمىن، ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىن جانە قازتۇتىنۋوداعى قاراعاندى ەكونوميكالىق ۋنيۆەرسيتەتىن بىتىرگەن.
ەڭبەك جولىن ورىس ءتىلى مەن ادەبيەتى ءمۇعالىمى بولىپ باستاعان. ءار جىلدارى مەكتەپ ديرەكتورىنىڭ تاربيە ءىسى جونىندەگى ورىنباسارى، ادىسكەر بولىپ جۇمىس ىستەگەن، ءبىلىم ساپاسىن باقىلاۋ جانە قامتاماسىز ەتۋ جۇيەسىندە ءارتۇرلى قىزمەتتەر اتقارعان.
2020–2023 جىلدارى قاراعاندى وبلىسى بويىنشا ءبىلىم سالاسىنداعى ساپانى قامتاماسىز ەتۋ دەپارتامەنتى باسشىسىنىڭ ورىنباسارى، ال 2023–2025 جىلدارى وسى دەپارتامەنتتى باسقارعان. 2025 جىلى ق ر وقۋ-اعارتۋ مينيسترلىگىنىڭ ءبىلىم سالاسىنداعى ساپانى قامتاماسىز ەتۋ كوميتەتى ءتوراعاسىنىڭ ورىنباسارى قىزمەتىن اتقارعان.