سيسيليا جاعالاۋىندا شامامەن 2100 جىل بۇرىن سۋعا باتقان ەجەلگى ريمدىك ساۋدا كەمەسى تابىلدى. بۇل ولجانى يتاليالىق سۇڭگۋىرلەر جاساعان، دەپ حابارلايدى infohub.kz.
مادەني مۇرانى قورعاۋ جونىندەگى كارابينەرلەر بولىمشەسىنىڭ سۇڭگۋىرلەرى ايماقتىق تەڭىز باسقارماسىمەن بىرلەسىپ، كەمەنى مادزارا-دەل-ۆاللو قالاسى جاعالاۋىنان شامامەن ءۇش ميل قاشىقتىقتا، 46 مەتر تەرەڭدىكتە تاپتى. كەمەنىڭ ۇزىندىعى — 21 مەتر، ەنى — 6 مەتر.
بىرەگەي نىسان دجاكومو دە مولا مەن يگور بيسۋللي ەسىمدى سۇڭگۋىر اڭشىلاردىڭ كومەگىمەن تابىلدى. ولار سكانەردە انوماليانى بايقاپ، تۇبىنە تۇسكەن. اپات ورنىندا ارحەولوگتار "Dressel 1A" تيپىندەگى جۇزدەگەن جاقسى ساقتالعان امفورالاردى تىركەدى. بۇل سيليندر ءتارىزدى ىدىستار ءبىزدىڭ داۋىرىمىزگە دەيىنگى II-I عاسىرلاردا شاراپ تاسىمالداۋ ءۇشىن كەڭىنەن قولدانىلعان. سونداي-اق ماماندار زاكىرلەردىڭ ەكى قورعاسىن وزەگىن تاپتى.
يتاليانىڭ مادەنيەت ءمينيسترى الەسساندرو دجۋلي بۇل ولجانى سوڭعى جىلدارداعى سۋ استى ارحەولوگياسىنداعى ەڭ ماڭىزدىلاردىڭ ءبىرى دەپ اتادى. كەمەنىڭ ءجۇرۋ باعىتىن جانە كەيىنگى ريم رەسپۋبليكاسى داۋىرىندەگى ساۋدا ەگجەي-تەگجەيلەرىن دالىرەك انىقتاۋ ءۇشىن زەرتتەۋلەر جالعاسادى.