Rollme كومپانياسى View سەرياسىنداعى اقىلدى كوزىلدىرىكتەردى ۇسىندى. ولار 12 مەگاپيكسەلدى Sony كامەراسىمەن، داۋىستىق جاساندى ينتەللەكت كومەكشىسىمەن جانە سويلەسۋدى ناقتى ۋاقىتتا اۋدارۋ فۋنكسياسىمەن جابدىقتالعان. قۇرىلعىنىڭ باعاسى نەبارى $100 (شامامەن 45 مىڭ تەڭگە)، بۇل ونى كەڭ اۋديتورياعا قولجەتىمدى ەتەدى. بۇل كوزىلدىرىكتەردىڭ قانداي مۇمكىندىكتەرى بار جانە وندىرۋشىگە تومەن باعانى ساقتاۋعا نە كومەكتەستى — Kursiv LifeStyle ايتادى.
سەرياعا ەكى مودەل كىرەدى — AuraView جانە ProView. ەكەۋى دە فۋتۋريستىك گادجەتتەن گورى قاراپايىم كوزىلدىرىككە ۇقسايدى. وپراۆاعا Sony IMX386 كامەراسى ورناتىلعان، ول ءبىرىنشى ادامنان فوتو جانە ۆيدەو تۇسىرۋگە مۇمكىندىك بەرەدى. ءتۇسىرۋ ءۇشىن سامايداعى فيزيكالىق تۇيمەنى باسۋ جەتكىلىكتى، ال جازبا 4 گب كولەمىندەگى كىرىستىرىلگەن جادتا ساقتالادى.
كامەرا تەك فوتوعا عانا ەمەس، سونىمەن قاتار زاتتار مەن كورنەكتى ورىنداردى تانۋعا، كوز الدىنداعى ءماتىندى اۋدارۋعا جانە سويلەسۋ كەزىندە اۋدارماعا كومەكتەسەدى. كوزىلدىرىكتە ChatGPT سياقتى مودەلدەرمەن جۇمىس ىستەيتىن داۋىستىق كومەكشى دە بار.
دىبىسقا سامايداعى باعىتتالعان ديناميكتەر جاۋاپ بەرەدى. ولار قۇلاققا جاقىن ورنالاسقاندىقتان، مۋزىكا مەن اڭگىمەنى قورشاعان الەمنەن وقشاۋلانباي تىڭداۋعا بولادى. سمارتفونعا Bluetooth 5.4 جانە Wi-Fi 6 ارقىلى قوسىلادى.
اۆتونومدىلىقتى 280 ما·سىيىمدىلىقتاعى اككۋمۋلياتور قامتاماسىز ەتەدى. ءوندىرۋشى 10-12 ساعات جۇمىس ىستەۋگە ۋادە بەرەدى، دەگەنمەن بەلسەندى ءتۇسىرۋ جانە اۋدارمانى قولدانۋ بۇل ۋاقىتتى ايتارلىقتاي قىسقارتۋى مۇمكىن.
AuraView مەتالل جارتىلاي جيەكتى وپراۆامەن جانە قوڭىر لينزالارمەن، ال ProView پلاستيك تولىق جيەكتى وپراۆامەن جابدىقتالعان. سوڭعىسى تونيروۆكالانعان جانە ءمولدىر لينزالارمەن بىرگە كەلەدى.
بۇعان دەيىن Kursiv LifeStyle Meta كومپانياسى Meta Glasses اقىلدى كوزىلدىرىكتەرىنىڭ جاڭا جەلىسىن ۇسىنعانىن جازعان. الدىڭعى مودەلدەردەن ايىرماشىلىعى، جاڭا ءونىم بيۋدجەتتىك سەگمەنتكە جاتادى — باعالارى $299-دان (شامامەن 150 مىڭ تەڭگە) باستالادى.